વડોદરામાં ડુપ્લિકેટ ફિરકીઓનું કૌભાંડ ઝડપાયું: SOGએ વાડી વિસ્તારમાંથી 916 રીલ સાથે લાખોનો મુદ્દામાલ જપ્ત કર્યો

મકરસંક્રાંતિના તહેવારને હવે ગણતરીના દિવસો જ બાકી છે, ત્યારે વડોદરામાં પતંગ રસિયાઓ સાથે થતી મોટી છેતરપિંડીનો પર્દાફાશ થયો છે. વડોદરા શહેર સ્પેશિયલ ઓપરેશન ગ્રુપ (SOG) એ વાડી વિસ્તારમાં દરોડો પાડીને ખોટા લેબલ લગાવી વેચાતી 900થી વધુ દોરીની રીલ ઝડપી પાડી છે. વેપારીઓ ગ્રાહકોને વધુ તારની લાલચ આપીને કઈ રીતે છેતરતા હતા, જુઓ આ અહેવાલમાં.

ઉત્તરાયણ પૂર્વે વડોદરાનું આકાશ પતંગોથી ભરાય તે પહેલાં જ પોલીસે પ્રતિબંધિત અને શંકાસ્પદ દોરીના વેપારીઓ પર લાલ આંખ કરી છે. વડોદરા SOGની ટીમને બાતમી મળી હતી કે વાડી વિસ્તારની રાજપરાની પોળમાં આવેલા એક ગોડાઉનમાં શંકાસ્પદ દોરીનો જથ્થો સંગ્રહાયેલો છે. બાતમીના આધારે પોલીસે દરોડો પાડતા ત્યાંથી અલગ-અલગ કંપનીના લેબલવાળી કુલ 916 નંગ દોરીની રીલ મળી આવી હતી.
પોલીસ તપાસમાં જે ખુલાસો થયો છે તે ચોંકાવનારો છે. આ ફિરકીઓ પર 9 તાર અને 12 તારના ખોટા લેબલ લગાવવામાં આવ્યા હતા. હકીકતમાં દોરીમાં તેટલા તાર ન હોવા છતાં, ગ્રાહકો પાસેથી ઉંચા ભાવ વસૂલીને તેમની સાથે છેતરપિંડી કરવામાં આવી રહી હતી.

🚨પોલીસ કાર્યવાહીની વિગત:

SOG એ લાખો રૂપિયાની કિંમતનો આ જથ્થો કબજે કરી લીધો છે. પોલીસે પ્રાથમિક તપાસમાં નોંધ્યું છે કે તહેવારની મોસમમાં વધુ નફો કમાવવાના આશયથી ગ્રાહકોને ગુણવત્તાના નામે છેતરવામાં આવતા હતા. હાલ પોલીસે આ મામલે ગોડાઉન માલિક વિરુદ્ધ કાયદેસરની કાર્યવાહી હાથ ધરી છે અને આ જાળ ક્યાં સુધી ફેલાયેલી છે તેની તપાસ શરૂ કરી છે.

🫵તમે પણ જો ઉત્તરાયણ માટે દોરી ખરીદવા જઈ રહ્યા હોવ, તો સાવધાન રહેજો. માત્ર લેબલ જોઈને છેતરાશો નહીં. SOGની આ કાર્યવાહીથી ડુપ્લિકેટ માલ વેચનારા વેપારીઓમાં ફફડાટ વ્યાપી ગયો છે.