PCBના દરોડાના બે કલાક બાદ જ બાતમીદાર હોવાની શંકાએ બુટલેગરે યુવકને ધમકી આપી

• બુટલેગરે બે કલાકમાં બાતમીદાર કેવી રીતે શોધી કાઢ્યો? તે તપાસ નો વિષય
• વર્ષ 2023માં પણ માથાભારે બુટલેગર વિપુલ પંચાલે સ્થાનિકો પર હુમલો કર્યો હતો
• ભૂતકાળમાં ન્યાય માટે પોલીસ ભવન સુધી આવેલા રહીશો, આજે પણ બુટલેગરથી ભયભીત!

વડોદરા શહેરમાં બુટલેગરોનો આતંક એટલી હદે વધી ગયો છે કે, પોલીસ દ્વારા બુટલેગરના ધંધા પર દરોડો પાડવામાં આવે તે બાદ બુટલેગરો પોલીસના બાતમીદારને શોધીને તેણે જાનથી મારી નાખવાની ધમકી આપી રહ્યા છે. મહત્વની વાત એ છે કે , પોલીસને બાતમી આપનારનું નામ બુટલેગર સુધી કોણે પહોચાડ્યું હશે તે પણ તપાસનો વિષય છે. જયારે દંતેશ્વરના કુખ્યાત બુટલેગરે પોલીસને બાતમી આપતો હોવાની શંકા રાખી ધમકી આપ્યાની ફરિયાદ નોંધાતાં મકરપુરા પોલીસે તપાસ શરૂ કરી છે.

પ્રાપ્ત માહિતી અનુસાર 28મીની રાત્રે 9.30 વાગે શહેર ગુના નિવારણ શાખા(PCB)એ ઘાઘરેટિયામાં દરોડો પાડ્યો હતો. સાંઈબાબાના મંદિર પાસે ખુલ્લી જગ્યામાં દારૂ વેચતા મિતલ પંચાલને ઝડપી વિદેશી દારૂની 53 હજારની કિંમતની 153 બોટલો જપ્ત કરી હતી. પોલીસે પૂછપરછ કરતા દારૂ વિપુલ પંચાલ નામના બુટલેગરનો હોવાનું જણાવ્યું હતું.

દરોડા પાડ્યાના બે કલાક બાદ રાત્રે 11.45 કલાકે દંતેશ્વર રાઠોડવાસમાં રહેતા અને ચાઈનીસની લારી ચલાવતા ગણપતસિંહ ધારિયાને ફોન આવ્યો હતો. જેમાં પોતે વિપુલ પંચાલ ઉર્ફે ડોન બોલતો હોવાનું જણાવ્યું હતું અને પોલીસને તું મારા દારૂના ધંધાની બાતમી કેમ આપે છે એમ જણાવી અપશબ્દો બોલ્યો હતો. તારું મર્ડર કરાવી નાંખીશ એવી ધમકી આપી હતી. પરિણામે ગભરાયેલા ગણપતસિંહ મકરપુરા પોલીસ મથકે પહોંચ્યા હતા. જ્યાં પોલીસ સમક્ષ ગણપતસિંહ દ્વારા લેખિતમાં ફરિયાદ કરી બુટલેગરથી બચાવી લેવા માટે માંગ કરી હતી.

બુટલેગરે બે કલાકમાં બાતમીદાર કેવી રીતે શોધી કાઢ્યો?
પોલીસ વિભાગમાં ગુન્હાહિત પ્રવૃતિઓની બાતમી આપતા બાતમીદારોની ઓળખ ગુપ્ત રાખવાની હોય છે. પોલીસ વિભાગ આ મામલે ઘણું સંવેદનશીલ છે. જો બાતમીદારની માહિતી સાર્વજનિક થઇ જાય તો તેના જાનને ખતરો હોઈ શકે છે. PCB દ્વારા 28 તારીખે પાડવામાં આવેલા દરોડાના બે કલાકમાં ફરિયાદી ગણપતસિંહ પર બુટલેગરે ફોન કરીને આપેલી ધમકી પોલીસની ગોપનીયતા પર પણ સવાલો ઉભા કરે છે. બાતમીદાર હોવાની શંકાએ એક વ્યક્તિને ફોન કરીને ધમકી આપતા બુટલેગરને કોણે માહિતી આપી હશે? શું પોલીસ વિભાગ અને રેડ કરનાર એજન્સી PCBમાં કોઈ બુટલેગરનો બાતમીદાર છુપાયેલો છે ?

બુટલેગર વિપુલ પંચાલ વિરુદ્ધ ભૂતકાળમાં પણ મોરચો પોલીસ ભવન આવ્યા હતા
મકરપુરા પોલીસ મથકની હદમાં ઘાઘરેટીયા વિસ્તારમાં વર્ષોથી શરાબના ધંધાનું સામ્રાજ્ય ચલાવતા વિપુલ પંચાલ વિરુદ્ધ ભૂતકાળમાં પણ વિસ્તારના રહીશો પર હુમલો કર્યા અને માર માર્યાના કિસ્સાઓ બનેલા છે. ગત 14 જુલાઈ 2023ના રોજ વિસ્તારના રહીશો બુટલેગર વિપુલ પંચાલ અને પરિવાર વિરુદ્ધ રજૂઆત કરવા પોલીસ ભવન ખાતે આવી પહોચ્યા હતા. તે સમયે પણ એક સ્થાનિક પરિવાર પર વિપુલ પંચાલ દ્વારા હુમલો કરી રીક્ષાની તોડફોડ કરી હોવાના આક્ષેપો થયા હતા. સ્થાનિકોએ તે સમયે જણાવ્યું હતું કે ,પોલીસ કંટ્રોલ રૂમમાં વારંવાર કોલ કરવા છતાંય પોલીસ આવી ન હતી.

અઢી વર્ષ પહેલા બુટલેગર વિપુલ પંચાલે સ્થાનિક રહીશો સામે કરેલા હુમલા અને ધાકધમકી બાદ પણ આજે ફરી એક વાર બાતમીદાર હોવાની શંકાએ ચાઇનીઝની લારી ચલાવતા યુવકને ધમકી આપ્યાનો કિસ્સો સામે આવ્યા બાદ સેવા, સુરક્ષા અને સલામતીના સિદ્ધાંતો પર વડોદરા પોલીસ સફળ થઇ નથી તેમ લાગી રહ્યું છે.