- નકલી ઈ-ચલાણ: ટ્રાફિક પોલીસના નામે લિંક મોકલીને બેંકની માહિતી ચોરી લેવાય છે.
- વાયરસ એપ્લિકેશન: વોટ્સએપ દ્વારા અજાણી એપ ડાઉનલોડ કરાવવી મોબાઈલ માટે જોખમી.
- ડિજિટલ સુરક્ષા: અજાણી લિંક કે એપ્લિકેશનને પરવાનગી આપવી નહીં.
- હેલ્પલાઈન નંબર: ફ્રોડના કિસ્સામાં તાત્કાલિક 1930 પર સંપર્ક કરવો.
વડોદરા: ડિજિટલ યુગમાં ટેકનોલોજીની સાથે સાયબર ગુનેગારોની તરકીબો પણ બદલાઈ રહી છે. હાલમાં સોશિયલ મીડિયા અને વોટ્સએપ પર ટ્રાફિક પોલીસના નામે નકલી ઈ-ચલાણ મોકલી નાગરિકો સાથે છેતરપિંડી કરવામાં આવી રહી છે. સાયબર ઠગાઈના વધતા બનાવોને જોતા નાગરિકોએ અત્યંત સાવધ રહેવાની જરૂર છે.
❓કેવી રીતે થાય છે છેતરપિંડી?
સાયબર ગઠીયાઓ સૌથી પહેલા વાહન નંબરના આધારે નકલી ઈ-ચલાણનો મેસેજ મોકલે છે. જેમાં ટ્રાફિક નિયમ ભંગ થયો હોવાનું જણાવી દંડ ભરવા માટે એક શંકાસ્પદ લિંક આપે છે. આ લિંક હૂબહૂ સરકારી વેબસાઈટ જેવી જ દેખાતી હોવાથી લોકો છેતરાઈ જાય છે. આ લિંક પર ક્લિક કરતા જ બેંક ખાતાની વિગતો અને યુપીઆઈ (UPI) પિન જેવી ગુપ્ત માહિતી ગુનેગારોના હાથમાં આવી જાય છે અને સેકન્ડોમાં ખાતું ખાલી થઈ જાય છે.
બીજી પદ્ધતિમાં ગઠીયાઓ વોટ્સએપ દ્વારા નકલી એન્ડ્રોઇડ એપ્લિકેશન ફાઈલ મોકલે છે. આ એપ્લિકેશન ડાઉનલોડ કરતાની સાથે જ મોબાઈલનો સંપૂર્ણ કંટ્રોલ ગુનેગારો પાસે જતો રહે છે. જેનો ઉપયોગ કરીને તેઓ ઓટીપી (OTP) મેળવી બેંક એકાઉન્ટ અને સોશિયલ મીડિયા એકાઉન્ટ પર કબજો જમાવી લે છે.
🧐સાયબર નિષ્ણાતોની સલાહ અને સુરક્ષાના પગલાં:
આવા સાયબર ફ્રોડથી બચવા માટે નિષ્ણાતોએ કેટલીક મહત્વની સલાહ આપી છે:👇
- વોટ્સએપ કે એસએમએસ (SMS) દ્વારા મળેલી કોઈ પણ અજાણી લિંક પર ક્લિક ન કરવું.
- કોઈપણ એપ્લિકેશન માત્ર ઓફિશિયલ એપ સ્ટોર (જેમ કે પ્લે સ્ટોર) પરથી જ ડાઉનલોડ કરવી.
- કોઈપણ શંકાસ્પદ એપ્લિકેશનને મેસેજ, ફોન કોલ કે કોન્ટેક્ટ્સની પરવાનગી (Permission) આપવી નહીં.
- જો આવા સંદેશા ગ્રૂપમાં આવે તો સંબંધિત વ્યક્તિને બ્લોક કરી દેવી.
🫵જો કમનસીબે કોઈ વ્યક્તિ આવા સાયબર ફ્રોડનો ભોગ બને, તો ગભરાયા વિના તાત્કાલિક રાષ્ટ્રીય સાયબર હેલ્પલાઈન નંબર ‘1930’ પર સંપર્ક કરવો અથવા સત્તાવાર સાયબર ક્રાઈમ પોર્ટલ પર ફરિયાદ નોંધાવવી. સમયસરની ફરિયાદ તમને આર્થિક નુકસાનથી બચાવી શકે છે
