વડોદરામાં ટાટા જેનોનમાં ગુપ્ત ટાંકીઓ બનાવી ગોવાથી લવાતો દારૂની હેરાફેરી કરતો શખ્સ ઝડપાયો.

શહેરના પોલીસ કમિશનર નરસિમ્હા કોમારની સૂચનાથી પી.સી.બી. શાખાએ દારૂના વેપારીઓની નવી મોડસ ઓપરેન્ડીનો પર્દાફાશ કર્યો છે. રાજસ્થાનમાં ગાડીમાં સ્પેશિયલ ટાંકીઓ બનાવડાવી, ગોવાથી ઇંગ્લીશ દારૂ લાવી વડોદરામાં વેચતા એક રીઢા શખ્સને પી.સી.બી.એ ફિલ્મી ઢબે ઝડપી પાડ્યો છે. ગાડીની લાઈટો અને સીટની પાછળ છુપાયેલા દારૂના જથ્થાને જોઈને પોલીસ પણ ચોંકી ઉઠી હતી

📍ચોક્કસ બાતમી અને ટ્રેપ:

વડોદરા પી.સી.બી.ના પી.આઈ. સી.બી. ટાંડેલના માર્ગદર્શન હેઠળ હેડ કોન્સ્ટેબલ કાળુભાઈ અને હિતેન્દ્રસિંહને એક સચોટ બાતમી મળી હતી. બાતમી હતી કે દાંતેશ્વર ચિત્રાનગરનો અમિત સોલંકી પોતાની કાળા કલરની ટાટા જેનોન (નંબર GJ-16-CB-8736) માં ગોવાથી દારૂ ભરીને તરસાલી તરફ આવી રહ્યો છે. પોલીસે વોચ ગોઠવી તરસાલી-ધનયાવી રોડ પર આ વાહનને આંતર્યું હતું.

🧐ચોંકાવનારી મોડસ ઓપરેન્ડી (M.O.):

જ્યારે પોલીસે ગાડીની તપાસ કરી ત્યારે દારૂ છુપાવવાની આધુનિક પદ્ધતિ સામે આવી:

• આરોપીએ રાજસ્થાનમાં ગાડીમાં 3 લોખંડની ટાંકીઓ ફીટ કરાવી હતી.
• ​દારૂ ભરવા માટેના ઢાંકણ ગાડીની પાછળની લાઈટો અને સીટની પાછળ એવી રીતે છુપાવ્યા હતા કે કોઈને ખ્યાલ ન આવે.
• દારૂ કાઢવા માટેના સ્પેશિયલ વાલ્વ પાછળના ટાયરના ગાર્ડની અંદર ફીટ કરવામાં આવ્યા હતા.

👇જપ્ત કરેલો મુદ્દામાલ:

પોલીસે સ્થળ પરથી લાખો રૂપિયાનો મુદ્દામાલ જપ્ત કર્યો છે:

• ​ઇંગ્લીશ દારૂ (છૂટો): 245 લીટર (કિંમત ₹3.67 લાખ)
• ​દારૂની બોટલો: 5 નંગ
• ​વાહન: ટાટા જેનોન (કિંમત ₹5 લાખ)
• ​અન્ય: રોકડ અને મોબાઈલ સહિત કુલ ₹9,17,980 નો મુદ્દામાલ.

🚨પોલીસ કાર્યવાહી

પી.સી.બી.એ આરોપી અમિત મણિલાલ સોલંકીને ઝડપી પાડી કપુરાઈ પોલીસ સ્ટેશનમાં પ્રોહિબિશન એક્ટ મુજબ ગુનો દાખલ કરાવ્યો છે. પોલીસ હવે એ તપાસ કરી રહી છે કે ગોવામાં કયા બારમાંથી આ જથ્થો લાવવામાં આવતો હતો અને વડોદરામાં કોને સપ્લાય કરવાનો હતો.

🫵બુટલેગરો ગમે તેટલી નવી ટેકનિક અપનાવે, પરંતુ વડોદરા પોલીસની બાજ નજરથી બચવું મુશ્કેલ છે. પી.સી.બી.ની આ સફળ કામગીરીથી દારૂ માફિયાઓમાં ફફડાટ ફેલાયો છે.