બરોડા ક્રિકેટ એસોસિએશન (BCA) દ્વારા આયોજિત પ્રતિષ્ઠિત અંડર-14 લેટ ડી.કે. ગાયકવાડ ક્રિકેટ ટુર્નામેન્ટની ફાઈનલ મેચ તાજેતરમાં MPCC ગ્રાઉન્ડ ખાતે રમાઈ હતી. વડોદરાની કુલ 35 જેટલી ટીમો વચ્ચે રમાયેલી આ ટુર્નામેન્ટના અંતિમ મુકાબલામાં તાજ M.E.S. અને દર્શનમ ટીમ વચ્ચે ખરાખરીનો જંગ જામ્યો હતો, જેમાં તાજ M.E.S. ટીમે શાનદાર પ્રદર્શન કરી 7 વિકેટે વિજય મેળવી ચેમ્પિયનશીપ પોતાના નામે કરી હતી.
ફાઈનલ મેચમાં પ્રથમ ઈનિંગમાં દર્શનમ ટીમે બેટિંગ કરતા તમામ વિકેટ ગુમાવીને 194 રન બનાવ્યા હતા. જેના જવાબમાં તાજ M.E.S. ટીમે પોતાની પ્રથમ ઈનિંગમાં 210 રન બનાવીને મહત્વપૂર્ણ સરસાઈ મેળવી હતી.
બીજી ઈનિંગમાં મેચનું પાસું પલટાયું હતું. તાજ M.E.S. ના બોલરોની સચોટ બોલિંગ સામે દર્શનમ ટીમ ટકી શકી ન હતી અને માત્ર 50 રનના સ્કોર પર ઓલઆઉટ થઈ ગઈ હતી. જીત માટેના આસાન લક્ષ્યાંકનો પીછો કરતા તાજ M.E.S. ટીમે 3 વિકેટ ગુમાવીને 35 રન બનાવી લીધા હતા અને 7 વિકેટે ભવ્ય વિજય હાંસલ કર્યો હતો.
આ ફાઈનલ મેચમાં ખેલાડીઓએ પોતાના વ્યક્તિગત પ્રદર્શનથી સૌને પ્રભાવિત કર્યા હતા,જેમાં મિહિર શાહ (મેન ઓફ ધ મેચ): ફાઈનલ મેચમાં સર્વશ્રેષ્ઠ પ્રદર્શન કરતા મિહિરે 91 રન ફટકાર્યા હતા અને સાથે 2 વિકેટ પણ ઝડપી હતી. તેમના આ ઓલરાઉન્ડ પ્રદર્શન બદલ તેમને મેન ઓફ ધ મેચ જાહેર કરવામાં આવ્યા હતા.તેવી જ રીતે હેમ મિસ્ત્રી એ મેચ દરમિયાન કુલ 8 વિકેટ ઝડપીને વિરોધી ટીમને મુશ્કેલીમાં મુકી દીધી હતી.યશ ત્રિવેદી નુ પ્રદર્શન પણ અદ્ભુત રહ્યું હતું તેમને મેચમાં કુલ 7 વિકેટ ઝડપીને ટીમની જીતમાં મહત્વનો ફાળો આપ્યો હતો.
આમ, કુલ 35 ટીમો વચ્ચે રમાયેલી આ ટુર્નામેન્ટમાં તાજ M.E.S. એ શ્રેષ્ઠ રમત દાખવી ટ્રોફી પર કબજો જમાવ્યો હતો.
