સુરક્ષા કે દંડનું ઉઘરાણું? ગુજરાતમાં હેલ્મેટ ડ્રાઇવને લઈને જનતામાં ભારે આક્રોશ

• ખાસ ઝુંબેશ: 1 મે થી 31 મે સુધી સમગ્ર રાજ્યમાં હેલ્મેટ ડ્રાઇવ; ટુ-વ્હીલર પર પાછળ બેસનાર માટે પણ હેલ્મેટ ફરજિયાત.
• સરકારી કચેરીઓ પર વોચ: હેલ્મેટ વગર ઓફિસ આવતા અધિકારીઓ અને કર્મચારીઓ સામે પણ લેવાશે કડક પગલાં.
• રોજિંદો રિપોર્ટ: પોલીસ કમિશનરોએ દરરોજ સવારે 8 વાગ્યા સુધીમાં દંડની વિગતોનો રિપોર્ટ મુખ્ય કચેરીને મોકલવો પડશે.
• જનતાનો સવાલ: “ચૂંટણી પતી અને રેલીઓ પણ પતી, હવે શું સામાન્ય જનતાના ખિસ્સા ખાલી કરવાનું આ ઉઘરાણું છે?”

વડોદરા/ગુજરાત: રાજ્યમાં માર્ગ અકસ્માતોમાં થતા મોતના આંકડા ઘટાડવા માટે ગુજરાત પોલીસ આજથી એક્શન મોડમાં આવી છે. 1 મે થી 31 મે 2026 સુધી ચાલનારી આ ખાસ ‘હેલ્મેટ ડ્રાઇવ’ અંતર્ગત ટ્રાફિકના નિયમોનું કડક પાલન કરાવવામાં આવશે. ઇન ચાર્જ આઈજી મકરંદ ચૌહાણના આદેશ મુજબ, મોટર વાહન અધિનિયમની કલમ 129 હેઠળ ચાલક અને પાછળ બેસનાર બંને માટે હેલ્મેટ અનિવાર્ય છે.

🧐સરકારી બાબુઓ સામે લાલ આંખ:

આ વખતે પોલીસની વ્યૂહરચનામાં મોટો ફેરફાર જોવા મળ્યો છે. અવારનવાર નિયમો તોડતા સરકારી કર્મચારીઓ સામે હવે કડક વલણ અપનાવવામાં આવ્યું છે. તમામ સરકારી કચેરીઓના ગેટ પર પોલીસ તૈનાત રહેશે અને હેલ્મેટ વગર આવતા અધિકારીઓને કોઈપણ શેહશરમ રાખ્યા વગર દંડવામાં આવશે. પોલીસ વડાઓ દ્વારા દરરોજ આંકડાકીય માહિતી સાથે રિપોર્ટિંગ કરવાની પણ સૂચના આપવામાં આવી છે.

🗣️જનતામાં છૂપો રોષ:

જોકે, પોલીસની આ ડ્રાઇવને લઈને સોશિયલ મીડિયા અને લોકમુખે ચર્ચાઓ પણ શરૂ થઈ છે. જનતા સવાલ ઉઠાવી રહી છે કે, જ્યારે ચૂંટણીની મોટી-મોટી રેલીઓ યોજાય છે ત્યારે હેલ્મેટના નિયમો કેમ ગાયબ થઈ જાય છે? શું ચૂંટણીમાં થયેલા ખર્ચનું ઉઘરાણું હવે સામાન્ય જનતા પાસેથી કરવામાં આવી રહ્યું છે? સુરક્ષાના નામે થતી આ કડક ઉઘરાણી સામે જનતામાં મિશ્ર પ્રતિસાદ જોવા મળી રહ્યો છે.

👮પોલીસનો હેતુ નાગરિકોની સુરક્ષાનો છે કે માત્ર દંડ વસૂલવાનો, તે તો આવનાર સમય જ કહેશે. પરંતુ હાલ તો હેલ્મેટ વગર નીકળવું વાહનચાલકોના ખિસ્સા પર ભારે પડી શકે છે.