કાનપુરમાં ભયાનક વિમાન દુર્ઘટના: ગંગા બેરેજ પાસે ટ્રેનિંગ એરક્રાફ્ટ ક્રેશ થતા પાયલટ અને કો-પાયલટના મો*ત

• વિમાન દુર્ઘટના: કાનપુરના ગંગા બેરેજ પાસે ગર્ગ એવિએશનનું ટ્રેનિંગ પ્લેન ક્રેશ થયું.
• બે વ્યક્તિઓના મોત: ગુજરાતના ઇન્સ્ટ્રક્ટર સચિન ભાટિયા અને ટ્રેઇની અભિષેક પૂજારીનું દુઘટનામાં કરુણ મૃ*ત્યુ.
• તંત્રની ત્વરિત કાર્યવાહી: ફાયર બ્રિગેડ અને પોલીસ દ્વારા રેસ્ક્યૂ ઓપરેશન હાથ ધરી વિસ્તાર કોર્ડન કરાયો.
• ઉચ્ચસ્તરીય તપાસ: વર્ષ ૨૦૨૩માં સામેલ કરાયેલા આ વિમાન અંગે ડીજીસીએ દ્વારા તપાસ શરૂ કરવામાં આવી છે.

કાનપુર: ઉત્તર પ્રદેશના કાનપુરના ગંગા બેરેજ પાસે આજે એક ગમખ્વાર ટ્રેનિંગ એરક્રાફ્ટ ક્રેશ થવાની ઘટના સામે આવી છે. આ ભયાનક દુર્ઘટનામાં પ્લેનમાં સવાર પાયલટ અને કો-પાયલટ બંનેના કરુણ મો*ત નીપજ્યા છે. ઘટનાની જાણ થતાં જ રેસ્ક્યૂ અને ફાયર બ્રિગેડની ટીમો તાત્કાલિક સ્થળ પર પહોંચી ગઈ હતી અને રાહત તેમજ બચાવ કામગીરી હાથ ધરી હતી.

🧐શું હતી ઘટના?

મળતી માહિતી મુજબ, અકસ્માતનો ભોગ બનેલું ટ્રેનિંગ એરક્રાફ્ટ ‘ગર્ગ એવિએશન’ સેન્ટરનું હતું. કાનપુરના નત્થા ખેડા વિસ્તારમાં ગંગા બેરેજ પાસે વિમાન ક્રેશ થતાં જ સ્થાનિક લોકોએ તુરંત ફાયર બ્રિગેડ અને પોલીસને જાણ કરી હતી. પોલીસ કમિશનર રઘુવીર લાલના જણાવ્યા અનુસાર, આ ચાર સીટર વિમાને સવારે સાડા અગિયાર વાગ્યે ઉડાન ભરી હતી અને લગભગ ૧૧:૫૦ વાગ્યે તે દુર્ઘટનાગ્રસ્ત થઈ ગયું હતું.

આ ગોઝારી અકસ્માતમાં ગુજરાતના રહેવાસી ફ્લાઇટ ઇન્સ્ટ્રક્ટર સચિન ભાટિયા અને કર્ણાટકના વતની ટ્રેઇની અભિષેક પૂજારીનું નિધન થયું છે. ઇન્સ્ટ્રક્ટર પાસે ૩૦૦૦ કલાકથી વધુ ઉડાન ભરવાનો અનુભવ હતો. ટેક્નમ કંપનીના આ વિમાનને વર્ષ ૨૦૨૩માં જ ટ્રેનિંગ માટે ફ્લીટમાં સામેલ કરવામાં આવ્યું હતું. ઘટનાની ગંભીરતાને ધ્યાનમાં રાખીને ડીજીસીએ (DGCA) ને જાણ કરી દેવામાં આવી છે અને સમગ્ર વિસ્તારને કોર્ડન કરી તપાસના ચક્રો ગતિમાન કરવામાં આવ્યા છે.