- મગરે આધેડને બનાવ્યા શિકાર: કડોદરા ગામના 55 વર્ષીય મકબુલભાઈ ગરાસીયા પર નદીમાં ન્હાતી વખતે મગરે હુમલો કર્યો હતો.
- ૩ દિવસની જહેમત બાદ મૃતદેહ મળ્યો: ફાયર બ્રિગેડ અને પોલીસના સઘન સર્ચ ઓપરેશન બાદ અદલાપુરા નજીકથી મૃતદેહ મળી આવ્યો.
- શરીર પર હુમલાના નિશાન: મગરો દ્વારા શરીરને ફાડી ખાધાના સ્પષ્ટ ચિહ્નો મળતા ઘટનાની ગંભીરતા ઉજાગર થઈ.
- વન વિભાગ સામે રોષ: 10 થી 12 મગરોનો વસવાટ હોવાથી ગ્રામજનો દ્વારા નદી કિનારે મગરોને પાંજરે પૂરવાની પ્રબળ માંગ ઉઠી છે
વડોદરા જિલ્લાના ડભોઇ તાલુકાના કડોધરા ગામ પાસેથી વહેતી દેવ-ઢાઢર નદીમાં મગરોનો આતંક ચરમસીમાએ પહોંચ્યો છે. નદીમાં નાહવા ઉતરેલા 55 વર્ષીય આધેડને મગર ઊંડા પાણીમાં ખેંચી ગયાની આશંકા વચ્ચે સતત ત્રણ દિવસ સુધી ચલાવાયેલા વ્યાપક સર્ચ ઓપરેશન બાદ આખરે આધેડનો ક્ષતિગ્રસ્ત મૃતદેહ મળી આવતા સમગ્ર પંથકમાં અરેરાટી સાથે ભારે રોષ ફેલાઈ ગયો છે.
પ્રાપ્ત વિગતો અનુસાર, કડોધરા ગામના બારીયા ફળિયામાં રહેતા 55 વર્ષીય મકબુલભાઈ મહંમદભાઈ ગરાસીયા ગત બે-ત્રણ દિવસ પૂર્વે ગામ નજીકના ગોઝાલી બ્રિજ પાસેથી પસાર થતી દેવ નદી તરફ ગયા હતા અને ત્યારબાદ રહસ્યમય સંજોગોમાં ગુમ થયા હતા. પરિવારજનોએ શોધખોળ કરતાં નદી કિનારેથી મકબુલભાઈના કપડાં મળી આવ્યા હતા. જેથી તેઓ નદીમાં નાહવા ઉતર્યા હોવા અને ત્યાં રહેલા ખુંખાર મગરોમાંથી કોઈએ તેમના પર પ્રાણઘાતક હુમલો કરી ઊંડા પાણીમાં ઢસડી ગયા હોવાની પ્રબળ શંકા વ્યક્ત કરાઈ હતી.
આ ઘટનાની ગંભીરતાને ધ્યાનમાં રાખીને વડોદરા ફાયર બ્રિગેડ અને પોલીસની ટીમો દ્વારા બોટ અને ખાસ સાધનોની મદદથી નદીમાં સઘન શોધખોળ હાથ ધરવામાં આવી હતી. મગરોની મોટી સંખ્યા અને જોખમી પ્રવાહ વચ્ચે સતત ત્રણ દિવસ સુધી ચાલેલા રેસ્ક્યૂ ઓપરેશનના અંતે અદલાપુરા ગામ નજીક નદીમાંથી મકબુલભાઈનો મૃતદેહ મળી આવ્યો હતો. મૃતદેહ પર મગરોએ જીવલેણ હુમલો કરી શરીરને ફાડી ખાધાના સ્પષ્ટ નિશાનો જોવા મળ્યા હતા, જે આ દુર્ઘટનાની ભયાનકતા બયાં કરે છે. પોલીસે મૃતદેહને પોસ્ટમોર્ટમ અર્થે મોકલી આપી આગળની કાયદેસરની કાર્યવાહી હાથ ધરી છે. અવારનવાર બનતી આવી ઘટનાઓને પગલે સ્થાનિક ગ્રામજનોએ વન વિભાગ સમક્ષ આ વિસ્તારમાંથી મગરોને તાત્કાલિક પાંજરે પૂરવા અથવા સુરક્ષાના યોગ્ય પગલાં લેવા માટે ઉગ્ર માંગ કરી છે.
