સેવન્થ ડે સ્કૂલમાં ફરી લોહીયાળ જંગ! મોનિટર પર બ્લેડથી હુમલો, DEO એ ફટકારી નોટિસ

અમદાવાદની જાણીતી ‘સેવન્થ ડે સ્કૂલ’ ફરી એકવાર વિવાદના કેન્દ્રમાં છે. અગાઉ એક વિદ્યાર્થીની હત્યાના કિસ્સા બાદ હજુ પણ આ શાળામાં શિસ્તનો અભાવ હોય તેવું દેખાઈ રહ્યું છે. ધોરણ 7માં અભ્યાસ કરતા એક વિદ્યાર્થી (મોનિટર) પર ત્રણ સહપાઠીઓએ મળીને હિંસક હુમલો કર્યો છે. બ્લેડ વડે હુમલો કરવાની આ ઘટનાએ વાલીઓના જીવ અધ્ધર કરી દીધા છે. આ મામલે DEO દ્વારા કડક કાર્યવાહીના સંકેતો આપવામાં આવ્યા છે.

❓શું હતી સમગ્ર ઘટના?

અમરાઈવાડી વિસ્તારમાં આવેલી સેવન્થ ડે સ્કૂલમાં શિસ્ત જાળવવી એક વિદ્યાર્થીને ભારે પડી છે. ધોરણ 7ના ક્લાસ મોનિટર ‘કાર્તિક’ (નામ બદલેલ છે) એ જ્યારે અન્ય ત્રણ વિદ્યાર્થીઓને લાઈનમાં ચાલવા માટે ટકોર કરી, ત્યારે આ ત્રણેય વિદ્યાર્થીઓએ તેની સાથે ઝઘડો કર્યો હતો.

🚨બ્લેડ વડે હુમલો અને ધમકી:

ઘટનાની ગંભીરતા ત્યારે વધી જ્યારે બીજા દિવસે વોશરૂમ પાસે આ ત્રણેય વિદ્યાર્થીઓએ મોનિટરને એકલો જોઈને આંતર્યો હતો. “તે અમને લાઈનમાંથી બહાર કેમ કર્યા?” તેમ કહીને ઉશ્કેરાયેલા એક વિદ્યાર્થીએ બ્લેડ વડે હુમલો કરી મોનિટરના શર્ટના બટન તોડી નાખ્યા હતા અને જાનથી મારી નાખવાની ધમકી આપી મારામારી કરી હતી.

👉તંત્રની બેદરકારી પર સવાલ:

નોંધનીય છે કે હાલ આ શાળાનો વહીવટ સરકાર હસ્તક છે, છતાં પણ આવી હિંસક પ્રવૃત્તિઓ પર લગામ નથી આવી રહી. શાળામાં વિદ્યાર્થીઓ જોખમી વસ્તુઓ કેવી રીતે લાવે છે અને શિક્ષકોની હાજરીમાં આવી ઘટના કેમ બને છે? તે સૌથી મોટો પ્રશ્ન છે.

🧐ડીઈઓ (DEO) ની કાર્યવાહી

​આ મામલો ગરમાતા અમદાવાદ શહેર ડીઈઓએ કડક વલણ અપનાવ્યું છે.

• શાળાના પ્રિન્સિપાલ અને એડમિન હેડને કારણદર્શક નોટિસ ફટકારવામાં આવી છે.
• ​ડીઈઓએ જવાબ માંગ્યો છે કે આટલી ગંભીર બેદરકારી બદલ તેમને નોકરીમાંથી કેમ છૂટા કરવામાં ન આવ્યા?
• ​અમરાઈવાડી પોલીસ સ્ટેશનમાં આ મામલે ફરિયાદ નોંધાઈ છે અને પીઆઈ (PI) તપાસ કરી રહ્યા છે.

🫵શિક્ષણના ધામમાં વધતી જતી આ હિંસા લાલબત્તી સમાન છે. એક તરફ શિસ્તની વાતો અને બીજી તરફ બાળકોના હાથમાં બ્લેડ, આ વિરોધાભાસ વાલીઓ માટે ચિંતાનો વિષય બન્યો છે. હવે જોવાનું એ રહેશે કે જવાબદારો સામે કેવા શિક્ષાત્મક પગલાં લેવાય છે