વડોદરા: “અમારા છોકરાઓની ફી કોણ ભરશે?” – પગાર ન થતા ફાયરના 100 કર્મચારીઓ હડતાલ પર

• આક્રોશ: 15-15 વર્ષથી ફરજ બજાવતા હંગામી કર્મચારીઓનો પગાર ન થતા હડતાલનું શસ્ત્ર ઉગામ્યું.
• આર્થિક સંકટ: 19 તારીખ છતાં પગાર નથી, કર્મચારીઓના ઘરના વીજ કનેક્શન કપાયા, સ્કૂલ ફી ભરવાના ફાંફા.
• કોર્ટનો આદેશ: કર્મચારીઓની તરફેણમાં હુકમ હોવા છતાં કોર્પોરેશન દ્વારા અમલવારીમાં ઠાગાઠૈયા.
• વૈકલ્પિક વ્યવસ્થા: હડતાલને પગલે વિહિકલપુલના ડ્રાઇવરો દ્વારા ફાયરની કામગીરી ચલાવવાની ફરજ પડી.

​વડોદરા: વડોદરા મ્યુનિસિપલ કોર્પોરેશન દ્વારા સંચાલિત ફાયર બ્રિગેડના ૧૦૦થી વધુ હંગામી કર્મચારીઓએ આજે પડતર પ્રશ્નો અને પગાર મુદ્દે અચાનક વીજળીક હડતાલ પર ઉતરી જતા પાલિકા તંત્રમાં ભારે દોડધામ મચી ગઈ છે. શહેરની સુરક્ષા માટે રાત-દિવસ દોડતા આ જવાનો આજે નવલખી કમ્પાઉન્ડમાં એકઠા થઈ પોતાની હૈયા વરાળ ઠાલવી રહ્યા છે.

👉15 વર્ષની સેવા છતાં અન્યાય:

હડતાલ પર ઉતરેલા કર્મચારીઓમાં એવા અનેક જવાનો છે જેઓ છેલ્લા 15 વર્ષથી કોર્પોરેશનમાં ફરજ બજાવે છે. કર્મચારીઓનો આક્ષેપ છે કે નામદાર કોર્ટે તેમની તરફેણમાં હુકમ કર્યો હોવા છતાં, કોર્પોરેશન વહીવટી તંત્ર દ્વારા તેનો અમલ કરવાને બદલે ઉપલી અદાલતમાં પડકારવાની તૈયારીઓ કરી રહ્યું છે, જે કર્મચારીઓ સાથે અન્યાય સમાન છે.

🧐પરિવારો પર આર્થિક આફત:

આજે 19 તારીખ થઈ હોવા છતાં હજુ સુધી કર્મચારીઓનો પગાર થયો નથી. પોતાની વેદના વ્યક્ત કરતા કર્મચારીઓએ જણાવ્યું કે, “અમારા બાળકોની સ્કૂલ અને ટ્યુશન ફી બાકી છે, ઘરનું લાઈટ બિલ અને ગેસ બિલ ભરવાના પૈસા નથી. હાલત એવી છે કે કેટલાક કર્મચારીઓના ઘરના વીજ કનેક્શન પણ કાપી નાખવામાં આવ્યા છે.” કોન્ટ્રાક્ટર રીન્યુ થાય કે ન થાય, તેની સજા કર્મચારીઓના પરિવારે કેમ ભોગવવી? તેવો સવાલ પણ ઉઠાવ્યો છે.

🚨વહીવટી તંત્રની દોડધામ:

ફાયર બ્રિગેડના ડ્રાઇવરો હડતાલ પર ઉતરી જતાં શહેરની ઈમરજન્સી સેવાઓ ખોરવાય નહીં તે માટે કોર્પોરેશને તાત્કાલિક વિહિકલપુલમાંથી ડ્રાઇવરો મંગાવીને કામચલાઉ વ્યવસ્થા ઊભી કરી છે. જોકે, અનુભવી કર્મચારીઓની ગેરહાજરીમાં ફાયર બ્રિગેડની કામગીરી કેટલી સચોટ રહેશે તે જોવું રહ્યું.

હવે જોવાનું એ રહે છે કે કોર્પોરેશનના ઉચ્ચ અધિકારીઓ આ જવાનોની વ્યાજબી માંગણીઓ સંતોષે છે કે પછી આ વિવાદ વધુ વકરશે.