વડોદરા શહેરમાં દારૂબંધીના અમલ માટે પોલીસ એક્શન મોડમાં છે. હરણી પોલીસ સ્ટેશનની ટીમે નેશનલ હાઈવે 48 પર ફિલ્મી ઢબે દરોડો પાડીને લાખો રૂપિયાનો વિદેશી દારૂ ઝડપી પાડ્યો છે. કન્ટેનર ટ્રકમાંથી પીકઅપ ડાલામાં દારૂનું કટિંગ થઈ રહ્યું હતું તે જ સમયે પોલીસે દરોડો પાડી કુલ 4 શખ્સોને દબોચી લીધા છે.
બાતમી અને દરોડો: હરણી પોલીસ સ્ટેશનના પીઆઈ એસ.વી. વસાવા અને પીએસઆઈ યુ.એ. મલેકની ટીમ પેટ્રોલિંગમાં હતી. આ દરમિયાન ચોક્કસ બાતમી મળી હતી કે દેણા બ્રિજ નજીક સર્વિસ રોડ પર મોટા પાયે દારૂનું કટિંગ ચાલી રહ્યું છે. પોલીસે સમય સૂચકતા વાપરી તુરંત જ દરોડો પાડ્યો હતો.
મુદ્દામાલની વિગત: પોલીસને ઘટનાસ્થળેથી RJ પાસિંગનું કન્ટેનર અને GJ પાસિંગનું મહિન્દ્રા પીકઅપ ડાલું મળી આવ્યું હતું. તપાસ કરતા અંદરથી વિદેશી દારૂ અને બીયરના કુલ 4,498 નંગ મળી આવ્યા હતા.
દારૂની કિંમત, મોબાઈલ ફોન અને વાહનો મળીને કુલ રૂ. 36,19,400નો મુદ્દામાલ જપ્ત કરવામાં આવ્યો છે.
ધરપકડ અને વોન્ટેડ: આ ઓપરેશનમાં પોલીસે હરિયાણાના બે અને વડોદરાના બે મળી કુલ 4 આરોપીઓની ધરપકડ કરી છે. જ્યારે આ નેટવર્ક પાછળના મુખ્ય સૂત્રધાર ગણાતા સુનીલ ચૌધરીને વોન્ટેડ જાહેર કરી તેની શોધખોળ શરૂ કરવામાં આવી છે.
🚨પોલીસ કમિશનર નરસિમ્હા કોમરના આદેશ બાદ વડોદરા પોલીસ હાઈવે પર બાઝ નજર રાખી રહી છે. આ સફળ ઓપરેશનથી બુટલેગરોમાં ફફડાટ ફેલાઈ ગયો છે. હવે જોવાનું એ રહેશે કે વોન્ટેડ સુનીલ ચૌધરી ક્યારે પોલીસના સકંજામાં આવે છે.
