- પાસા કાર્યવાહી: વડોદરા શહેરમાં અસામાજિક પ્રવૃત્તિઓ પર લગામ લગાવવા 3 કુખ્યાત ગુનેગારો પર પાસા વોરંટ.
- સુરક્ષાનો ઉદ્દેશ્ય: તહેવારો અને જાહેર કાર્યક્રમો દરમિયાન શહેરની શાંતિ ડહોળનારા તત્વો સામે કડક કાર્યવાહી.
- અલગ-અલગ જેલમાં રવાના: આરોપીઓને ભાવનગર, અમદાવાદ અને સુરત મધ્યસ્થ જેલ ખાતે મોકલી અપાયા.
- પોલીસનું મોનિટરિંગ: વારંવાર ગુના આચરતા માથાભારે ઈસમો પર પોલીસ તંત્રની બાજ નજર.
વડોદરા: વડોદરા શહેરમાં કાયદો અને વ્યવસ્થાની સ્થિતિને વધુ સુદ્રઢ બનાવવા તથા અસામાજિક તત્વો પર અંકુશ મેળવવા માટે પોલીસ કમિશનર નરસિંહ કોમાર દ્વારા મહત્વપૂર્ણ અભિયાન હાથ ધરવામાં આવ્યું છે. આ અભિયાન અંતર્ગત, શહેરના વિવિધ વિસ્તારોમાં હત્યાનો પ્રયાસ, મારામારી અને પ્રોહિબિશન જેવી ગંભીર પ્રવૃત્તિઓમાં સામેલ ૩ માથાભારે ઈસમોને પાસા (PASA) હેઠળ અટકાયતમાં લઈને રાજ્યની અલગ-અલગ જેલોમાં મોકલી આપવામાં આવ્યા છે.
1. યશ ઉર્ફે લસ્સી સંતોષભાઈ વસાવા (ગોત્રી):
લક્ષ્મીપુરા પોલીસ સ્ટેશન વિસ્તારમાં રહેતા આ શખ્સ સામે હત્યાના પ્રયાસ, મારામારી, ધમકી અને પ્રોહિબિશન સહિતના 15 જેટલા ગંભીર ગુનાઓ નોંધાયેલા છે. નિર્દોષ નાગરિકો સાથે જાહેર માર્ગો પર ઝઘડા કરવા અને ઈજાઓ પહોંચાડવાના કારણે વિસ્તારમાં ભયનું વાતાવરણ હતું. પોલીસે તેને પાસા હેઠળ અટકાયતમાં લઈ ભાવનગર જેલ ખાતે મોકલી આપ્યો છે.
2. વિવેક ઉર્ફે બન્ની મોહનભાઈ કેવલાણી (ફતેહગંજ):
અકોટા પોલીસ સ્ટેશન વિસ્તારના આ આરોપીએ પોતાના સાગરીતો સાથે મળીને ગુનાહિત ટોળકી બનાવી હતી. તલવાર વડે હુમલો કરવો, મારામારી કરવી અને પ્રોહિબિશનના ગુનાઓમાં સંડોવાયેલા વિવેક સામે 10 જેટલા ગંભીર ગુનાઓ નોંધાયેલા છે. જાહેર વ્યવસ્થા માટે જોખમી બની ગયેલા આ શખ્સને પાસા હેઠળ અટકાયત કરી અમદાવાદ મધ્યસ્થ જેલ ખાતે મોકલી આપવામાં આવ્યો છે.
3. ગોપાલસિંહ ડુંગરસિંહ રાવત (રાજસ્થાન):
છાણી પોલીસ સ્ટેશન વિસ્તારમાં પકડાયેલા આ આરોપી દ્વારા મોટા પાયે ભારતીય બનાવટના વિદેશી દારૂની હેરાફેરી કરવામાં આવતી હતી. ગેલ્વેનાઈઝ પાઈપોની આડમાં દારૂનો જથ્થો ઘુસાડવાના રેકેટમાં પકડાયેલા આ શખ્સે માનવ સ્વાસ્થ્ય સાથે ચેડાં કર્યા હતા. તેની અસામાજિક પ્રવૃત્તિને ડામવા માટે તેને પાસા હેઠળ અટકાયત કરી સુરત મધ્યસ્થ જેલ ખાતે મોકલી દેવામાં આવ્યો છે.
🚨પોલીસનું મક્કમ વલણ:
પોલીસ કમિશનરની સૂચના મુજબ, શહેરના કોઈ પણ વિસ્તારમાં શાંતિ અને ભાઈચારો જળવાઈ રહે તે માટે પોલીસ સતત મોનિટરિંગ કરી રહી છે. આ પ્રકારના માથાભારે ઈસમો જે જામીન પર મુક્ત થઈને ફરી ગુનાખોરી આચરતા હતા, તેમને હવે પાસા હેઠળ જેલભેગા કરવામાં આવ્યા છે, જેથી સામાન્ય નાગરિકો સુરક્ષા અનુભવી શકે.
