- આક્રમક મંત્રી: મહિલા અને બાળ કલ્યાણ મંત્રી મનીષાબેન વકીલનો કોંગ્રેસ પર પ્રહાર; બિલના વિરોધને ગણાવ્યું ‘મહિલા વિરોધી માનસિકતા’.
- “કુંઠીત માનસિકતા”: મંત્રીનો આક્ષેપ, “સામાન્ય પરિવારની બહેનો સંસદમાં પહોંચે તે કોંગ્રેસને ડર છે; પરિવારવાદ પોષવા મહિલાઓના અધિકારનો વિરોધ.”
- બે મોઢાની રાજનીતિ: કોંગ્રેસની કથની અને કરણી વચ્ચેનો તફાવત ખુલ્લો પડ્યો; વિકાસલક્ષી સુધારાઓમાં વિપક્ષનો હંમેશા વિરોધ.
- ચૂંટણીમાં જવાબ: મંત્રીની ચીમકી, “દેશની કરોડો મહિલાઓ આ નારી શક્તિ વિરોધી વલણનો બદલો આગામી ચૂંટણીમાં લેશે.”
વડોદરા/ગાંધીનગર: નારી શક્તિ વંદન અધિનિયમ પસાર ન થઈ શકવા બદલ રાજ્યના મહિલા અને બાળ કલ્યાણ મંત્રી મનીષાબેન વકીલે કોંગ્રેસ અને ઈન્ડી ગઠબંધન પર આકરા પ્રહાર કર્યા છે. મંત્રીએ કોંગ્રેસ પર આક્ષેપ કર્યો છે કે, વડાપ્રધાન નરેન્દ્ર મોદી દ્વારા દેશની માતૃશક્તિને સન્માન અને ગૌરવ આપવાની સુવર્ણ તકને કોંગ્રેસ અને તેના સાથી પક્ષોએ નિષ્ફળ બનાવી છે.
🧐કોંગ્રેસની ‘નકારાત્મક રાજનીતિ’:
મનીષાબેન વકીલે જણાવ્યું હતું કે, “આઝાદીના દાયકાઓ સુધી એકહથ્થુ શાસન કરનાર કોંગ્રેસે હંમેશા વિકાસની રાજનીતિમાં નકારાત્મકતા ફેલાવી છે. વડાપ્રધાન મોદીના નેતૃત્વમાં દેશમાં થઈ રહેલા રીફોર્મ્સ કોંગ્રેસના ‘કલ્ચર’ને પચતા નથી. તેમને ડર છે કે જો આ અધિનિયમ લાગુ થઈ જશે, તો સામાન્ય પરિવારની બહેનો વિધાનસભા અને સંસદમાં પ્રતિનિધિત્વ મેળવતી થઈ જશે, જે કોંગ્રેસની કુંઠીત માનસિકતાને સ્વીકાર્ય નથી.”
🚫જૂની આદત મુજબ વિરોધ:
મંત્રીએ વધુમાં જણાવ્યું હતું કે, કોંગ્રેસની બે મોઢાની રાજનીતિ આજે દેશ સમક્ષ ખુલ્લી પડી ગઈ છે. એક તરફ મહિલા સશક્તિકરણની વાતો કરવી અને બીજી તરફ જ્યારે કાયદો લાવવાનો સમય આવે ત્યારે તેને રોકવાનો પ્રયાસ કરવો—આ કોંગ્રેસની જૂની આદત છે. મંત્રીએ યાદ અપાવ્યું હતું કે, અગાઉ પણ કોંગ્રેસે બેંક ખાતા, સ્વાસ્થ્ય સુરક્ષા અને ટ્રિપલ તલાક જેવી મૂળભૂત સુવિધાઓનો વિરોધ કર્યો હતો. ‘લટકાના, ભટકાના અને અટકાના’ એવા ગતકડાં દ્વારા કોંગ્રેસે હંમેશા દેશને નુકસાન પહોંચાડ્યું છે.
📝સુધારાઓની યાદી:
મનીષાબેન વકીલે એક યાદી રજૂ કરતા જણાવ્યું હતું કે, કોંગ્રેસે માત્ર મહિલા અનામત જ નહીં, પરંતુ વન નેશન-વન ઈલેક્શન, યુસીસી, શરણાર્થી સુરક્ષા કાનૂન અને ડિજિટલ પેમેન્ટ જેવા અનેક રાષ્ટ્રહિતના સુધારાઓનો વિરોધ કર્યો છે. હવે આ તમામનો જવાબ દેશની નારી શક્તિ આગામી ચૂંટણીમાં આપશે.
મહિલા અનામતના મુદ્દે રાજકીય પારો ઊંચકાઈ રહ્યો છે. એક તરફ સત્તાધારી પક્ષ મહિલાઓને તેમનો હક્ક અપાવવાની વાત કરી રહ્યો છે, તો બીજી તરફ કોંગ્રેસ અને ઈન્ડી ગઠબંધન પર મહિલા વિરોધી હોવાના ગંભીર આક્ષેપો થઈ રહ્યા છે. હવે જોવાનું એ રહેશે કે આ રાજકીય વાકયુદ્ધ જનતામાં કેટલી અસર પાડે છે.
