- પોલીસનો મધ્યરાત્રિએ દરોડો: જેતલપુરની એરીસ રિટ્રીટ સોસાયટીમાં ચાલતી મહેફિલમાં પોલીસ પહોંચી.
- એક યુવતી અને ત્રણ યુવકો રંગેહાથ ઝડપાયા; ટેબલ પરથી વિદેશી દારૂની બોટલ અને હુક્કાનો સરંજામ જપ્ત.
- યુવતીએ ભાડે રાખેલા ફ્લેટમાં મિત્રોને બોલાવી કરી હતી પાર્ટી; પ્રોહિબિશન એક્ટ હેઠળ ગુનો નોંધાયો.
વડોદરા શહેરના અકોટા પોલીસ સ્ટેશનની ટીમે જેતલપુર વિસ્તારમાં ચાલતી અસામાજિક પ્રવૃત્તિઓ પર લગામ કસતા એક મોટી કાર્યવાહી કરી છે. જેતલપુર ચીકુવાડી પાસે આવેલી એરીસ રિટ્રીટ સોસાયટીના એક ફ્લેટમાં દારૂ અને હુક્કાની મહેફિલ માણી રહેલા યુવક-યુવતીઓને પોલીસે ઝડપી પાડ્યા છે.
📌ઘટનાની વિગત:
પોલીસને મળેલી બાતમી મુજબ, ગત શનિવારે રાત્રિના 3 વાગ્યાના સુમારે એરીસ રિટ્રીટના ફ્લેટ નંબર 101માં કેટલીક વ્યક્તિઓ દારૂની મહેફિલ માણી રહી હતી. આ માહિતીના આધારે અકોટા પોલીસની ટીમે તાત્કાલિક દરોડો પાડ્યો હતો. રેડ દરમિયાન ફ્લેટમાંથી એક યુવતી અને ત્રણ યુવકો મળી આવ્યા હતા, જેમના ટેબલ પરથી વિદેશી દારૂની બોટલ, હુક્કો અને હુક્કાના ફ્લેવર્સ મળી આવ્યા હતા.
🧐કોણ છે ઝડપાયેલા આરોપીઓ?
1. વ્રુશાન દિલીપસિંહ ગોહિલ (રહે. અમીનનગર સોસાયટી, છાણી) – નશાની હાલતમાં.
2. સાહિલ ઈમ્તિયાઝ પટેલ (રહે. ખુશ્બુનગર, તાંદળજા) – નશાની હાલતમાં.
3. ફૈઝાન યુસુફખાન (રહે. તાજ રેસિડેન્સી, તાંદળજા).
4. પ્રશિકા અમિત શિવા (રહે. એરીસ રિટ્રીટ, જેતલપુર/મૂળ પશ્ચિમ બંગાળ).
🚨પ્રાથમિક તપાસમાં જાણવા મળ્યું છે કે આ ફ્લેટ પ્રશિકા શિવાએ ભાડે રાખ્યો હતો અને તેણે જ તેના મિત્રોને પાર્ટી માટે બોલાવ્યા હતા. જોકે, ફૈઝાન અને પ્રશિકાએ નશો કર્યો ન હોવાનું સામે આવ્યું છે, જ્યારે અન્ય બે મિત્રો નશાની હાલતમાં હતા.
👮પોલીસ કાર્યવાહી:
અકોટા પોલીસે સ્થળ પરથી દારૂની બોટલ, હુક્કો અને ફ્લેવર મળી કુલ રૂ. 3,200નો મુદ્દામાલ કબજે કર્યો છે. પોલીસે ચારેય સામે પ્રોહિબિશનની વિવિધ કલમો હેઠળ ગુનો નોંધી કાયદેસરની કાર્યવાહી હાથ ધરી છે. મધ્યરાત્રિએ લક્ઝુરિયસ ફ્લેટમાં થયેલી આ રેડને પગલે સમગ્ર વિસ્તારમાં ભારે ચર્ચા જાગી છે.
