વડોદરા જિલ્લા પંચાયતમાં વિદાયની વેળા: ચૂંટાયેલા સભ્યોની 5 વર્ષની ટર્મ પૂર્ણ, સભાગૃહમાં સર્જાયા લાગણીસભર દ્રશ્યો.

• ટર્મ પૂર્ણ: 2021 થી 2026 સુધીની ચૂંટાયેલી બોડીની મુદત આવતીકાલે પૂરી થાય છે.
• હોદ્દેદારો: પ્રમુખ અશોક પટેલ, ગાયત્રીબેન મહિડા અને વિપક્ષી નેતા મુબારક પટેલનો મહત્વનો ફાળો.
• વાતાવરણ: વિદાય સમારંભમાં રાજકીય પક્ષના ભેદ ભૂલી સભ્યોએ સંવાદિતાના દ્રશ્યો સર્જ્યા.
• આભાર વિધિ: વહીવટી અધિકારીઓ અને DDO ના સહકાર બદલ આભાર વ્યક્ત કરાયો.

વડોદરા જિલ્લા પંચાયત માટે આજનો દિવસ ભાવુક કરી દેનારો રહ્યો. વર્ષ 2021 માં ચૂંટાયેલા સભ્યોની પાંચ વર્ષની ટર્મ આવતીકાલે પૂર્ણ થઈ રહી છે, ત્યારે આજે યોજાયેલા ખાસ વિદાય સમારંભમાં સભ્યોએ પોતાના છેલ્લા પ્રવચન આપ્યા હતા. રાજકીય આક્ષેપ-પ્રતિઆક્ષેપ બાજુ પર મૂકી સભ્યોએ ભીની આંખે એકબીજાની ક્ષમા માંગી વિદાય લીધી હતી.

વડોદરા જિલ્લા પંચાયતની વર્ષ 2021 માં યોજાયેલી ચૂંટણીમાં ભાજપના 27 અને કોંગ્રેસના 7 સભ્યો ચૂંટાઈ આવ્યા હતા. આ પાંચ વર્ષ દરમિયાન પ્રથમ અઢી વર્ષ પ્રમુખ તરીકે અશોક પટેલે અને ત્યારબાદ ગાયત્રીબેન મહિડાએ સુકાન સંભાળ્યું હતું. આજે પાંચ વર્ષની સફરના અંતે સભ્યોએ સભાગૃહમાં વિતેલા પાંચ વર્ષના અનુભવો રજૂ કર્યા હતા. સભાગૃહમાં થતી બોલાચાલી અને આક્ષેપોને માત્ર વિકાસ માટેના ગણાવી સભ્યોએ એકબીજા પાસે ક્ષમા યાચના પણ કરી હતી.

“અમે પક્ષથી ઉપર ઉઠીને જિલ્લાના વિકાસ માટે કામ કર્યું છે. અધિકારીઓ અને સભ્યોના સહયોગથી અનેક કાર્યો પાર પાડ્યા છે. આજે અમે ભલે છૂટા પડી રહ્યા છીએ, પણ લોકસેવાનું આ ભાથું હંમેશા યાદ રહેશે.”

જિલ્લા વિકાસ અધિકારી મમતા હિરપરાએ પણ ચૂંટાયેલા સભ્યોના કાર્યોની વિગતો આપી હતી. આ પ્રસંગે વિરોધ પક્ષના નેતા મુબારક પટેલે એક અનોખું સૂચન રજૂ કર્યું હતું. તેમણે ભાજપ અને કોંગ્રેસના તમામ સભ્યોનું એક ‘રીયુનિયન’ ગ્રુપ બનાવવાની અને ભવિષ્યમાં અધિકારીઓ સાથે સ્નેહ મિલન રાખવાની ઈચ્છા વ્યક્ત કરી હતી.

હવે જિલ્લા પંચાયતનો વહીવટ પ્રશાસક હસ્તક જશે કે નવી ચૂંટણીઓની જાહેરાત થશે તે જોવું રહ્યું, પણ આ પાંચ વર્ષના સંભારણા સભ્યોના મન પર હંમેશા અંકિત રહેશે.