વડોદરા 31 ડિસેમ્બર, 2025
વડોદરા શહેરમાં દિવસેને દિવસે વધી રહેલા ટ્રાફિકના ભારણને ઘટાડવા અને અકસ્માતો રોકવા માટે ટ્રાફિક પોલીસ અને કોર્પોરેશન દ્વારા એક મહત્વનો નિર્ણય લેવામાં આવ્યો છે. શહેરના મુખ્ય ચાર રસ્તાઓ પર ડાબી બાજુ (Left Turn) મુક્ત રાખવા માટે ‘સ્પ્રિંગ પોસ્ટ’ લગાવવાની કામગીરી તેજ કરવામાં આવી છે.
⚠️દુર્ઘટના બાદ તંત્ર જાગ્યું: 8 સંવેદનશીલ વિસ્તારોની ઓળખ
તાજેતરમાં કારેલીબાગ વુડા સર્કલ પાસે અકસ્માતમાં એક મહિલાના મોતની ઘટના બાદ પોલીસ તંત્ર હરકતમાં આવ્યું છે. અગાઉ પણ અનેક ચાર રસ્તાઓ પર ગોઝારા અકસ્માતો સર્જાયા છે. આ સમસ્યાના ઉકેલ માટે તંત્રએ શહેરના સૌથી વધુ ટ્રાફિક ધરાવતા 8 વિસ્તારો શોધી કાઢ્યા છે, જેમાંથી અત્યાર સુધીમાં 5 સ્થળોએ સ્પ્રિંગ પોસ્ટ લગાવી દેવામાં આવ્યા છે.
કયા વિસ્તારોમાં સ્પ્રિંગ પોસ્ટ લાગ્યા?
- અકોટા-દાંડિયા બજાર (સૌપ્રથમ પ્રયોગ)
- કારેલીબાગ વુડા સર્કલ
- સોમા તળાવ ચાર રસ્તા
- કાલાઘોડા ચાર રસ્તા
- નર્સિંગ હોમ અને નરહરી સર્કલ
🧐 નવી સુવિધા, નવા પડકારો
અકોટા-દાંડિયા બજારમાં આ પ્રયોગ સફળ રહ્યો હોવાનું જણાય છે, જ્યાં ડાબી બાજુ વળનારા વાહનચાલકોને હવે ટ્રાફિકમાં ઊભા રહેવું પડતું નથી. જોકે, અન્ય વિસ્તારોમાં સ્થિતિ થોડી અલગ છે:
ગૂંચવણભરી સ્થિતિ: અમિત નગરથી વુડા સર્કલ તરફ આવતા રસ્તે સ્પ્રિંગ પોસ્ટ હોવા છતાં અનેક વાહનચાલકો અજાણતા તે લેનમાં ઘૂસી જાય છે. જેને કારણે જેને સીધા જવું હોય તેને અન્ય લાંબા રસ્તે જવાની ફરજ પડે છે.
મુક્તાનંદ તરફ જતો માર્ગ: સ્પ્રિંગ પોસ્ટના કારણે રોડ સાંકડો પડતો હોવાથી ટ્રાફિક જામની સમસ્યા સર્જાય છે.
🫵નાગરિકોનું સૂચન: ફૂટપાથ સાંકડો કરો
સ્થાનિક વાહનચાલકો અને નિષ્ણાતોનું માનવું છે કે માત્ર સ્પ્રિંગ પોસ્ટ લગાવવાથી સમસ્યા હલ નહીં થાય. ખાસ કરીને કારેલીબાગ હોસ્પિટલ પાસેનો ફૂટપાથ ઘણો પહોળો છે, જેના કારણે વાહનચાલકો ટ્રાફિકથી બચવા ફૂટપાથ પર વાહનો ચલાવે છે. જો આ ફૂટપાથને સાંકડો કરીને રોડ પહોળો કરવામાં આવે, તો સ્પ્રિંગ પોસ્ટનો અમલ વધુ અસરકારક બની શકે તેમ છે.
આગામી દિવસોમાં બાકી રહેલા અન્ય ચાર રસ્તાઓ પર પણ સ્પ્રિંગ પોસ્ટ લગાવવાનું આયોજન છે, પરંતુ શું આ પ્રયોગ ટ્રાફિક ઘટાડશે કે ગૂંચવણ વધારશે તે જોવું રહ્યું.
