- ઓપરેશન પરાક્રમ: ગંભીર ગુના આચરનારા અને સરકારી ફરજમાં રૂકાવટ કરનાર સામે પોલીસની કડક કાર્યવાહી.
- પાસા હેઠળ ધરપકડ: જિલ્લા મેજિસ્ટ્રેટના આદેશ બાદ 4 મુખ્ય આરોપીઓને અટકાયતમાં લેવાયા.
- ટેકનિકલ સર્વેલન્સની સફળતા: હ્યુમન અને ટેકનિકલ સોર્સની મદદથી રાજપીપળા, વડોદરા અને ડભોઇથી આરોપીઓ ઝડપાયા.
- જેલવાસ: તમામ આરોપીઓને ભુજની ખાસ જેલ ખાતે મોકલી આપીને કાયદો અને વ્યવસ્થાની સ્થિતિ સુદ્રઢ કરવામાં આવી.
વડોદરા: વડોદરા જિલ્લા પોલીસ દ્વારા ગુનાખોરી ડામવા માટે શરૂ કરવામાં આવેલા ‘ઓપરેશન પરાક્રમ’ હેઠળ વધુ એક સફળ કાર્યવાહી કરવામાં આવી છે. રેન્જ આઈજી અને જિલ્લા પોલીસ અધિક્ષકના માર્ગદર્શન હેઠળ ડભોઇ પોલીસે ગંભીર ગુનાઓમાં સંડોવાયેલા ચાર કુખ્યાત આરોપીઓને પાસા (PASA) હેઠળ અટકાયતમાં લઈ જેલના સળિયા પાછળ ધકેલી દીધા છે.
❓શું હતી ઘટના?
ડભોઇ પોલીસ સ્ટેશનમાં ગત તારીખ 3 જૂન, 2026ના રોજ સરકારી દવાખાનામાં ફરજ દરમિયાન અડચણ ઉભી કરવા અને શરીર સંબંધી ગંભીર ગુનાઓ આચરવા અંગેનો કેસ નોંધાયો હતો. આ ગુનામાં સંડોવાયેલા આરોપીઓ વિરુદ્ધ ડભોઇ ડીવાયએસપી આકાશ પટેલના માર્ગદર્શન હેઠળ પાસાની દરખાસ્ત તૈયાર કરવામાં આવી હતી. જિલ્લા મેજિસ્ટ્રેટ દ્વારા આ દરખાસ્ત મંજૂર કરવામાં આવતા પોલીસે અટકાયતી વોરંટના આધારે આરોપીઓની ધરપકડ માટે ટીમો બનાવી હતી.
🧐ત્રણ શહેરોમાંથી આરોપીઓ ઝડપાયા:
પોલીસે હ્યુમન સોર્સ અને ટેકનિકલ સોર્સની મદદથી આરોપીઓના લોકેશન મેળવ્યા હતા. ડભોઇ પોલીસની અલગ-અલગ ટીમોએ રાજપીપળા, વડોદરા શહેર અને ડભોઇ એમ ત્રણેય સ્થળેથી દરોડા પાડીને કુલ ચાર આરોપીઓને ઝડપી પાડ્યા હતા. આ તમામ આરોપીઓને પલાણા (ભુજ) ખાસ જેલ ખાતે મોકલી આપવાની તજવીજ હાથ ધરવામાં આવી છે.
🚨ઝડપાયેલા આરોપીઓ:
૧. વારીસઅલી લિયાકતઅલી સૈયદ (રહે. રાજપીપળા, નર્મદા)
૨. સિકંદર ફકરુભાઈ ગરાસિયા (રહે. ડભોઇ)
૩. પરવેઝ ઉર્ફે રાજા સિકંદર ગરાસિયા (રહે. ડભોઇ)
૪. આસીફઅલી મહેબુબઅલી સૈયદ (રહે. તાંદલજા, વડોદરા)
👮આ કાર્યવાહીથી વિસ્તારમાં ગુનાખોરી આચરતા તત્વોમાં ભારે ફફડાટ વ્યાપી ગયો છે. જિલ્લા પોલીસની આ કામગીરીને લઈને પ્રશંસા થઈ રહી છે.
