વડોદરા ગ્રામ્ય પોલીસને મોટી સફળતા: ડભોઈ અને જરોદની ઘરફોડ ચોરીના ગુનાનો ભેદ ઉકેલાયો, ૨ રીઢા આરોપીઓ ઝડપાયા

વડોદરા: જિલ્લામાં મિલકત સંબંધી ગુનાઓ અટકાવવા અને વણઉકેલાયેલા ગુનાઓ શોધી કાઢવા માટે વડોદરા વિભાગના પોલીસ મહાનિરીક્ષક સંદીપ સિંહ તથા પોલીસ અધીક્ષક સુશીલ અગ્રવાલ દ્વારા આપવામાં આવેલી “ઓપરેશન પરાક્રમ”ની સૂચના હેઠળ ડભોઈ પોલીસે મોટી સફળતા મેળવી છે.

❓શું હતો સમગ્ર મામલો?

ગઈ તારીખ ૨૪/૦૨/૨૦૨૬ના રોજ રાત્રિના સમયે ડભોઈ પોલીસ સ્ટેશન વિસ્તારના થુવાવી ગામે આવેલ લેક સીટીમાં અજાણ્યા ઇસમોએ અંદાજે ₹૩,૨૮,૦૦૦/- ની કિંમતના કોપર વાયરો અને પ્લમ્બિંગના સામાનની ચોરી કરી હતી. આ ગુનાની તપાસ માટે ડભોઈ પી.આઈ. જે.એમ. ચાવડાના માર્ગદર્શન હેઠળ ટીમો બનાવવામાં આવી હતી.

🚨પોલીસે કેવી રીતે ઓપરેશન પાર પાડ્યું?

તપાસ દરમિયાન હ્યુમન સોર્સ અને ટેકનિકલ સર્વેલન્સની મદદથી બાતમી મળી હતી કે અગાઉ ચોરીમાં પકડાયેલ મિલન ઉર્ફે રાહુલ રાઠવા તેના સાથીદાર સાથે શંકાસ્પદ સામાન લઈ સ્પલેન્ડર મોટરસાયકલ (GJ-17-CF-2015) પર બોડેલીથી ડભોઈ તરફ આવી રહ્યો છે. પોલીસે તરસાણા ફાટક પાસે વોચ ગોઠવી બંને ઇસમોને ઝડપી પાડ્યા હતા.

🧐ઝડપાયેલા આરોપીઓની વિગત

૧. મિલનભાઈ ઉર્ફે રાહુલ કંચનભાઈ રાઠવા: રહે. હાલોલ (મૂળ રહે. કવાંટ, છોટાઉદેપુર). આ આરોપી સામે અગાઉ ૧૯ જેટલા ગુનાઓ નોંધાયેલા છે.

૨. હેમંતભાઈ ઉર્ફે બટકો વચમનભાઈ પવાર: રહે. હાલોલ (મૂળ રહે. અજમેર, રાજસ્થાન). આ આરોપી સામે અગાઉ ૧૧ જેટલા ગુનાઓ નોંધાયેલા છે.

👉કબ્જે કરેલ મુદ્દામાલ (કુલ કિંમત ₹૧,૯૮,૩૦૫/-)

• ​આર.આર. કેબલના કોપર વાયરો અને ટેલિફોન વાયરો.
• ​પ્લમ્બિંગનો સામાન (મેરોપોલ અને ડ્રાયવર્ટર).
• એક સ્પલેન્ડર મોટરસાયકલ (GJ-17-CF-2015).
• ​૨ મોબાઈલ ફોન.

✍️અન્ય ગુનાની કબૂલાત

પકડાયેલા આરોપીઓની સઘન પૂછપરછ દરમિયાન તેઓએ જરોદ પોલીસ સ્ટેશન વિસ્તારના કોટંબી ગામે આવેલ સાંઈ ઇન્ડસ્ટ્રીયલ એસ્ટેટમાં પણ ચોરી કરી હોવાની કબૂલાત કરી છે. આ સાથે જ પોલીસે ડભોઈ અને જરોદ એમ બે પોલીસ સ્ટેશનના વણઉકેલાયેલા ગુનાઓનો ભેદ ઉકેલી નાખ્યો છે.