ગંભીર અકસ્માત:દેથાણ નજીક NH-48 પર દૂધ ભરેલા ટેમ્પો અને અજાણ્યા વાહન વચ્ચે ટક્કર.
એકનું મોત:ટેમ્પોના ડ્રાઈવરનું ઘટનાસ્થળે જ મૃત્યુ, કન્ડકટર ગંભીર રીતે ઈજાગ્રસ્ત.
રેસ્ક્યુ ઓપરેશન:ફાયર વિભાગે દોઢ કલાકની જહેમત બાદ ટેમ્પોના પતરા કાપીને બંનેને બહાર કાઢ્યા.
પોલીસ તપાસ:અકસ્માત કયા વાહન સાથે થયો અને તેની પાછળનું સચોટ કારણ જાણવા પોલીસની તપાસ શરૂ.
કરજણ: વડોદરા-ભરૂચ હાઈવે પર આજે વહેલી સવારે એક ગમખ્વાર અકસ્માતની ઘટના સામે આવી છે. દેથાણ નજીક NH-48 પર મહારાષ્ટ્રથી દૂધ ભરીને વડોદરા તરફ આવી રહેલા એક આઇસર ટેમ્પો અને અજાણ્યા વાહન વચ્ચે પાછળથી ટક્કર થતાં ટેમ્પોના ડ્રાઈવરનું ઘટનાસ્થળે જ મોત નીપજ્યું છે, જ્યારે કન્ડકટરનો આબાદ બચાવ થયો છે.
❓શું હતી ઘટના?
આજે વહેલી સવારે અંદાજે 3:45 વાગ્યાના સુમારે ટેમ્પો (MH 17 BD 2034) જ્યારે પ્લેઝર ઇન્ડિયા કંપની નજીકથી પસાર થઈ રહ્યો હતો, ત્યારે આગળ ચાલતા અજાણ્યા વાહન સાથે તેની જોરદાર ટક્કર થઈ હતી. ટક્કર એટલી પ્રચંડ હતી કે ટેમ્પોનું કેબિન સંપૂર્ણપણે ક્ષતિગ્રસ્ત થઈ ગયું હતું અને ડ્રાઈવર-કન્ડકટર અંદર ફસાઈ ગયા હતા.
🚒ફાયર વિભાગની જહેમત:
ઘટનાની જાણ થતાં જ કરજણ ફાયર વિભાગની ટીમ તાત્કાલિક સ્થળ પર દોડી ગઈ હતી. ફાયરની ટીમે હાઇડ્રોલિક ઇક્વિપમેન્ટની મદદથી ટેમ્પોના પતરાં કાપીને અંદાજે દોઢ કલાકની ભારે જહેમત બાદ બંનેને બહાર કાઢ્યા હતા. 108 એમ્બ્યુલન્સના તબીબોએ ડ્રાઈવરને તપાસીને મૃત જાહેર કર્યો હતો, જ્યારે ગંભીર રીતે ઘાયલ કન્ડકટરને તાત્કાલિક સારવાર માટે હોસ્પિટલ ખસેડવામાં આવ્યો હતો.
🚨તપાસના ચક્રો ગતિમાન:
કરજણ ફાયર વિભાગની સમયસરની કામગીરીને કારણે કન્ડકટરનો જીવ બચાવી શકાયો છે. હાલ આ મામલે પોલીસ દ્વારા વધુ તપાસ હાથ ધરવામાં આવી છે કે અકસ્માત કયા સંજોગોમાં સર્જાયો અને ટેમ્પો જે વાહન સાથે અથડાયો તે કયું હતું. હાઈવે પર વહેલી સવારે બનેલી આ ઘટનાને પગલે વાહનચાલકોમાં પણ શોકની લાગણી પ્રસરી ગઈ છે.
