Vadodara
રોહિત-વિરાટની એન્ટ્રી પહેલા વડોદરા પોલીસ એક્શનમાં, હરણી પોલીસ સ્ટેશનથી અધિકારીઓને અપાયું ખાસ માર્ગદર્શન.
વડોદરા શહેર માટે આવતીકાલનો દિવસ ઐતિહાસિક બનવા જઈ રહ્યો છે. ૧૫ વર્ષના લાંબા વિરામ બાદ શહેરમાં આંતરરાષ્ટ્રીય ક્રિકેટ મેચનું પુનરાગમન થઈ રહ્યું છે. શહેર નજીક કોટંબી ખાતે નવનિર્મિત બી.સી.એ. (BCA) સ્ટેડિયમમાં ભારત અને ન્યૂઝીલેન્ડ વચ્ચે પ્રથમ વન-ડે મેચ રમાશે. રોહિત શર્મા અને વિરાટ કોહલી જેવા દિગ્ગજ ખેલાડીઓને લાઈવ રમતા જોવા માટે વડોદરાવાસીઓમાં ભારે ઉત્સાહ છે.
મેચ દરમિયાન હજારોની મેદની એકઠી થવાની હોવાથી વડોદરા શહેર પોલીસ દ્વારા લોખંડી બંદોબસ્ત અને ખાસ કરીને ટ્રાફિક મેનેજમેન્ટ પર ભાર મૂકવામાં આવ્યો છે. આજે વડોદરાના પોલીસ કમિશનર નરસિમ્હા કોમરે હરણી પોલીસ સ્ટેશન ખાતે ઉચ્ચ પોલીસ અધિકારીઓ સાથે એક મહત્વની સમીક્ષા બેઠક યોજી હતી.
પોલીસ કમિશનર દ્વારા અપાયેલી મુખ્ય સૂચનાઓ:
- ટ્રાફિક ડાયવર્ઝન: હાલોલ-વડોદરા હાઈવે પર વાહનોની અવરજવર માટે ખાસ ડાયવર્ઝન અને સાઈન બોર્ડ મૂકવાની સૂચના.
- પાર્કિંગ વ્યવસ્થા: સ્ટેડિયમની આસપાસના નિયત પાર્કિંગ સ્થળો પર વાહનોનું સુચારૂ સંચાલન થાય તેની ખાતરી.
- અવ્યવસ્થા નિવારણ: મેચ પૂરી થયા બાદ અફરાતફરી ન સર્જાય તે માટે એક્ઝિટ પોઈન્ટ્સ પર પોલીસ ફોર્સ તહેનાત રાખવી.
- રૂટ પેટ્રોલિંગ: હાઈવે અને સ્ટેડિયમ તરફ જતા રસ્તાઓ પર સતત પેટ્રોલિંગ ચાલુ રાખવા આદેશ.
🫵વડોદરા પોલીસ દ્વારા કરવામાં આવેલા આ આગોતરા આયોજનનો મુખ્ય હેતુ એ જ છે કે, ક્રિકેટ પ્રેમીઓ કોઈપણ પ્રકારની મુશ્કેલી વગર મેચનો આનંદ માણી શકે અને શહેરના ટ્રાફિક વ્યવસ્થામાં કોઈ વિઘ્ન ન આવે.