લગ્નના પવિત્ર બંધનને પૈસા કમાવવાનું સાધન બનાવતી ‘લૂંટેરી દુલ્હન’ની વધુ એક ચોંકાવનારી ઘટના સામે આવી છે. સુરેન્દ્રનગરના એક પરિવાર સાથે લગ્નના નામે લાખો રૂપિયાની છેતરપિંડી આચરવામાં આવી છે. લગ્ન બાદ માત્ર ૧૦ જ દિવસ સાસરીમાં રહીને દુલ્હન દાગીના અને રોકડ સાથે પિયર ભાગી ગઈ હતી. મકરપુરા પોલીસે આ હનીટ્રેપ જેવી ગેંગના એક સાગરીતની ધરપકડ કરી છે.
સુરેન્દ્રનગરના ધાંગધ્રા તાલુકાના સોલડી ગામે રહેતા અને આશા વર્કર તરીકે ફરજ બજાવતા તારાબેન ભલગામાએ પોતાના પુત્ર લાલજીના લગ્ન માટે પરિચિતોનો સંપર્ક કર્યો હતો. આ સંપર્ક દરમિયાન તેમને ભરૂચ અને વડોદરાની એક ટોળકીનો ભેટો થયો, જેમણે લગ્ન કરાવી આપવાના બહાને 3 લાખ રૂપિયાની માંગણી કરી હતી.
- સોદો: વડોદરાના નોવિનો રોડ પર આવેલી સોનાલી નામની યુવતી સાથે લગ્ન નક્કી થયા અને વચેટિયાઓએ લગ્ન કરાવવા પેટે લાખો રૂપિયા પડાવ્યા.
- લગ્ન અને લાલચ: લગ્ન બાદ લાલજીએ તેની પત્ની સોનાલીને નવો મોબાઈલ અને સોનાના દાગીના પણ કરાવી આપ્યા હતા.
- ફરાર: લગ્નના માત્ર ૧૦ દિવસ બાદ સોનાલીનો કહેવાતો ભાઈ હેમંત, તેની પત્ની અને મહેન્દ્ર પ્રજાપતિ નામનો શખ્સ સોનાલીને પિયર તેડવા આવ્યા હતા. સોનાલી ગયા બાદ ક્યારેય પરત ન ફરી અને તમામ આરોપીઓએ પોતાના મોબાઈલ ફોન બંધ કરી દીધા હતા.
🚨પોલીસ કાર્યવાહી
છેતરાયા હોવાનો અહેસાસ થતાં પીડિત પરિવારે વડોદરાના મકરપુરા પોલીસ સ્ટેશનમાં ફરિયાદ નોંધાવી હતી. પોલીસે ત્વરિત કાર્યવાહી કરતા આ ગેંગના એક સભ્ય મહેન્દ્ર મોહનભાઈ પ્રજાપતિ (રહે. મહેસાણા) ની ધરપકડ કરી લીધી છે.
🧐હજુ કોણ છે ફરાર?
- મુખ્ય સૂત્રધાર અને લૂંટેરી દુલ્હન: સોનાલી શ્રીવાસ્તવ
- અન્ય સાગરીતો: સોનાલીનો કહેવાતો ભાઈ હેમંત અને તેની પત્ની સહિત ત્રણ લોકો હજુ પણ પોલીસ પકડથી દૂર છે.
પોલીસ તપાસમાં બહાર આવ્યું છે કે આ એક સુનિયોજિત નેટવર્ક છે જે લગ્ન વાંચ્છુ યુવકોને નિશાન બનાવી લાખો રૂપિયા ખંખેરી લે છે. હાલ પોલીસ ફરાર આરોપીઓને પકડવા માટે ચક્રો ગતિમાન કર્યા છે.
🫵આ કિસ્સો ફરી એકવાર લાલબત્તી સમાન છે કે અજાણ્યા વચેટિયાઓ દ્વારા થતા લગ્નમાં સાવચેતી રાખવી કેટલી જરૂરી છે. જો તમે પણ કોઈના વિશ્વાસે લાખો રૂપિયા આપી લગ્ન કરી રહ્યા હોવ, તો પહેલા પાત્રની પૂરેપૂરી તપાસ કરી લેજો, નહીં તો આ પરિવારની જેમ છેતરાવાનો વારો આવી શકે છે.
