મિડલ ઈસ્ટમાં યુદ્ધની સ્થિતિ અને સપ્લાય ચેઈનમાં અવરોધ.
- મહેસાણા ડેરી: ગેસ સપ્લાયમાં 40% નો કાપ.
- સિરામિક ઉદ્યોગ: મોરબીમાં 100 થી વધુ એકમો બંધ.
- શાપર-વેરાવળ: 600 એકમો પર આર્થિક ફટકો.
રાજ્યમાં અત્યારે ઈંધણના મોરચે ચિંતાજનક સમાચાર સામે આવી રહ્યા છે. મિડલ ઈસ્ટમાં ઈરાન અને ઈઝરાયેલ વચ્ચે ચાલી રહેલા સંઘર્ષની સીધી અસર હવે ગુજરાતના ઉદ્યોગો અને ડેરી સેક્ટર પર પડી રહી છે. કોમર્શિયલ ગેસથી લઈને પ્રોપેન ગેસ સુધીના પુરવઠામાં મોટા કાપને કારણે મોરબીના સિરામિક પ્લાન્ટથી લઈને મહેસાણાની દૂધસાગર ડેરી સુધી ‘તાળા’ વાગે તેવી સ્થિતિ સર્જાઈ છે.
🐄ડેરી ઉદ્યોગ પર જોખમ:
મહેસાણાની દૂધસાગર ડેરી સહિત રાજ્યના અન્ય ડેરી પ્લાન્ટ્સમાં ગેસ પુરવઠામાં 40% સુધીનો કાપ મૂકવામાં આવ્યો છે. જો આ સ્થિતિ લાંબી ચાલશે તો દૂધ પ્રોસેસિંગના પ્લાન્ટ બંધ કરવા પડે તેવી નોબત આવી શકે છે. સૌથી મોટી ભીતિ મિલ્ક પાવડરના ઉત્પાદનને લઈને છે; જો ગેસ નહીં મળે તો પાવડરનું ઉત્પાદન ઠપ થઈ જશે, જેની અસર દૂધના સપ્લાય ચેઈન પર પણ પડી શકે છે.
🏨હોટલ અને રેસ્ટોરન્ટ ઉદ્યોગ મુશ્કેલીમાં:
કોમર્શિયલ ગેસ સિલિન્ડરની અછતને કારણે હોટલ, રેસ્ટોરન્ટ અને કેટરિંગ વ્યવસાય સાથે સંકળાયેલા લોકોની ચિંતા વધી છે. ગેસ સિલિન્ડર રિફિલિંગના સમયમાં વધારો થતા સામાન્ય જનતામાં પણ રાંધણ ગેસની અછત સર્જાશે તેવો ફફડાટ ફેલાયો છે.
🏭મોરબી અને શાપરના ઉદ્યોગો ઠપ:
પ્રોપેન ગેસનો પુરવઠો ખોરવાતા મોરબીના સિરામિક ઉદ્યોગને મોટો ફટકો પડ્યો છે.
- મોરબી: 100 થી વધુ ફેક્ટરીઓ અત્યારે બંધ હાલતમાં છે.
- શાપર-વેરાવળ: કાસ્ટિંગ અને ફોર્જિંગના 600 થી વધુ એકમો બંધ થવાના આરે છે. સરકારે ઉદ્યોગકારોને એક મહિના સુધી ઉત્પાદન બંધ રાખવા અંગે અભિપ્રાય માંગ્યો છે, જેનાથી હજારો શ્રમિકોની રોજીરોટી છીનવાઈ જવાનો ડર છે.
🫵આ ગંભીર પરિસ્થિતિને જોતા સિરામિક અને અન્ય ઉદ્યોગના પ્રતિનિધિ મંડળોએ ગાંધીનગર દોડી જઈ મુખ્યમંત્રી સમક્ષ રજૂઆત કરી છે. હવે જોવાનું એ રહે છે કે સરકાર ઉદ્યોગોને બચાવવા માટે કયા વૈકલ્પિક માર્ગો અપનાવે છે.
