- ક્રિકેટમાં રાજકારણ: BCA ની એપેક્ષ કમિટિની બેઠકને લઈને વિવાદ; 3 એપ્રિલે મળનારી બેઠક સામે ઉઠ્યા સવાલ.
- કોર્ટની શરતો: હાઈકોર્ટે માત્ર ‘રૂટીન વહીવટ’ ની આપી છે મંજૂરી; મોટા નિર્ણયો લેવા પર મૂક્યો છે પ્રતિબંધ.
- પક્ષપાતના આક્ષેપ: ચૂંટણીમાં ઉભા રહેલા એપેક્ષ કમિટિના જ કેટલાક સભ્યોને આમંત્રણ નથી અપાયું; પારદર્શિતા સામે સવાલ.
- કાયદાકીય ગૂંચ: જો બેઠકમાં મહત્વના નિર્ણયો લેવાશે તો હાઈકોર્ટના આદેશનો ભંગ ગણાશે; ક્રિકેટ વર્તુળોમાં ચર્ચાઓ તેજ.
વડોદરા: વડોદરાના પ્રતિષ્ઠિત બરોડા ક્રિકેટ એસોસિએશન (BCA) માં ફરી એકવાર વિવાદના મધપૂડા છંછેડાયા છે. આગામી 3 એપ્રિલે એપેક્ષ કમિટિની બેઠક બોલાવવામાં આવતા એસોસિએશનના આંતરિક રાજકારણમાં ગરમાવો આવી ગયો છે. ખાસ કરીને હાઈકોર્ટ દ્વારા મૂકવામાં આવેલી કડક શરતો વચ્ચે આ બેઠક યોજવાનો નિર્ણય ચર્ચાનું કેન્દ્ર બન્યો છે.
❓હાઈકોર્ટનો આદેશ શું છે?
તાજેતરમાં હાઈકોર્ટ દ્વારા BCA ને સ્પષ્ટ સૂચના આપવામાં આવી છે કે સંસ્થાએ માત્ર રૂટીન અને દૈનિક વહીવટી કામગીરી જ ચાલુ રાખવી. કોર્ટે કોઈપણ પ્રકારના નીતિગત (Policy decisions) કે મોટા નાણાકીય નિર્ણયો લેવા પર મનાઈ ફરમાવી છે. આવા સંજોગોમાં એપેક્ષ કમિટિની બેઠક શા માટે બોલાવાઈ છે અને તેમાં કેવા એજન્ડા પર ચર્ચા થશે, તે અંગે અનેક પ્રશ્નો ઊભા થયા છે.
🧐સભ્યોની અવગણના અને પારદર્શિતા:
વિવાદનું બીજું મુખ્ય કારણ એ છે કે હાલમાં જે ચૂંટણી યોજાવા જઈ રહી છે, તેમાં ઉમેદવારી નોંધાવનારા એપેક્ષ કમિટિના કેટલાક વર્તમાન સભ્યોને જ આ બેઠકનું આમંત્રણ આપવામાં આવ્યું નથી. આ પ્રકારની પસંદગીયુક્ત પદ્ધતિને કારણે પ્રક્રિયાની ન્યાયસંગતતા અને પારદર્શિતા પર શંકાની સોય તણાઈ રહી છે. વિરોધ કરી રહેલા સભ્યોનું માનવું છે કે આ એકતરફી પ્રક્રિયા છે.
👨⚖️કોર્ટના તિરસ્કારની ભીતિ:
ક્રિકેટ જગતના જાણકારોનું માનવું છે કે જો ૩ એપ્રિલની આ બેઠકમાં કોઈ પણ મહત્વપૂર્ણ કે નીતિગત નિર્ણય લેવામાં આવશે, તો તે સીધો હાઈકોર્ટના આદેશનો અનાદર ગણાશે. આ મામલે કાયદાકીય કાર્યવાહી થવાની પણ પૂરેપૂરી શક્યતા છે. હવે જોવાનું એ રહેશે કે BCA નું વર્તમાન શાસક જૂથ આ બેઠક યોજે છે કે પછી વિવાદને જોતા કોઈ ફેરફાર કરે છે.
🫵મેદાન પર રમાતી ક્રિકેટ કરતા અત્યારે BCA ના વહીવટી મેદાનમાં ખેલાઈ રહેલી આ ‘ગૂગલી’ કોને ક્લીન બોલ્ડ કરશે, તે તો સમય જ બતાવશે.
