વડોદરા: આવાસ યોજનાના નામે લાખોની ઠગાઈ, વડોદરા મ્યુનિસિપલ કોર્પોરેશનની ખોટી પહોંચ આપી 16 લોકોને છેતર્યા

• મોટી ઠગાઈ: આવાસના મકાનો અપાવવાના બહાને 16 લોકો પાસેથી ₹40.17 લાખ પડાવી લીધા.
• નકલી દસ્તાવેજ: ભોગ બનનારને વિશ્વાસમાં લેવા VMCની ખોટી પાવતીઓ અને દસ્તાવેજો પધરાવ્યા.
• પોલીસ એક્શન: ગોરવા પોલીસે મુખ્ય સૂત્રધાર હરીશ ચૌહાણની ધરપકડ કરી.
• સમયગાળો: જાન્યુઆરીથી ઓક્ટોબર ૨૦૨૫ દરમિયાન અલગ-અલગ તારીખે ખર્ચાયા લાખો રૂપિયા.

વડોદરા: સંસ્કારી નગરી વડોદરામાં આવાસ યોજનામાં મકાન અપાવવાના નામે વધુ એક મોટી છેતરપિંડીની ઘટના સામે આવી છે. શહેરના ગોરવા વિસ્તારમાં 16 જેટલા મધ્યમવર્ગીય પરિવારોને પોતાનું ઘર અપાવવાનું સપનું બતાવી એક ઠગે ₹40.17 લાખથી વધુની રકમ ખંખેરી લીધી છે. આ સમગ્ર મામલે ગોરવા પોલીસ સ્ટેશનમાં ફરિયાદ નોંધાતા પોલીસે તપાસનો ધમધમાટ તેજ કર્યો છે.

⚠️વિશ્વાસઘાત અને છેતરપિંડી:

પ્રાપ્ત વિગતો મુજબ, આરોપી હરીશ ચૌહાણે વડોદરા મ્યુનિસિપલ કોર્પોરેશન (VMC) ની આવાસ યોજનામાં મકાન અપાવવાનો દાવો કરી લોકોને વિશ્વાસમાં લીધા હતા. જાન્યુઆરીથી ઓક્ટોબર 2025 સુધીના સમયગાળા દરમિયાન તેણે અલગ-અલગ તારીખે 16 લોકો પાસેથી કુલ ₹40.17 લાખ રૂપિયા મેળવ્યા હતા. લોકોને વિશ્વાસ બેસે તે માટે ઠગે કોર્પોરેશનની નકલી પાવતીઓ અને ખોટા દસ્તાવેજો પણ બનાવી આપ્યા હતા.

🧐ઓફિસ બંધ કરી ફરાર:

જ્યારે મકાન મળવાનો સમય આવ્યો ત્યારે ઠગ હરીશ ચૌહાણ વાયદા કરવા લાગ્યો હતો. અંતે, કોઈ ઉકેલ ન આવતા અને લોકોના દબાણને પગલે તે પોતાની ઓફિસ બંધ કરીને રાતોરાત ફરાર થઈ ગયો હતો. જે બાદ છેતરાયેલા લોકોએ એકઠા થઈ ગોરવા પોલીસ સ્ટેશનના દ્વાર ખખડાવ્યા હતા.

🚨પોલીસ કાર્યવાહી:

ગોરવા પોલીસે 16 લોકોની ફરિયાદના આધારે ગુનો દાખલ કરી તપાસ હાથ ધરી હતી. ટેકનિકલ સર્વેલન્સ અને બાતમીદારોની મદદથી પોલીસે આરોપી હરીશ ચૌહાણની ધરપકડ કરી છે. પોલીસ હવે એ તપાસ કરી રહી છે કે આ ઠગાઈમાં તેની સાથે અન્ય કોઈ લોકો સામેલ છે કે કેમ અને તેણે આ નાણાં ક્યાં ખર્ચ્યા છે.

🫵આવાસ યોજનામાં મકાન મેળવવા ઈચ્છતા લોકોએ એજન્ટોના ભરોસે રહેવાને બદલે સીધા કોર્પોરેશનની ઓફિસમાં જઈને તપાસ કરવી હિતાવહ