વડોદરા શહેરમાં જાણે અકસ્માતોની વણઝાર લાગી હોય તેમ વધુ એક હૃદયદ્રાવક અકસ્માતની ઘટના સામે આવી છે. શહેરના પોશ ગણાતા સન ફાર્મા રોડ પર મોડી રાત્રે પુરપાટ ઝડપે દોડતી એક થાર ગાડીએ એક્ટિવા ચાલકને અડફેટે લેતા ગમખ્વાર અકસ્માત સર્જાયો હતો. આ ટક્કર એટલી ભયાનક હતી કે એક્ટિવા ચાલક યુવકનું ગંભીર ઈજાઓને કારણે સ્થળ પર જ કરુણ મોત નીપજ્યું હતું.
મળતી માહિતી અનુસાર, મૃતક યુવકની ઓળખ 28 વર્ષીય અભિષેક મોરે તરીકે થઈ છે. અભિષેકની કહાની સાંભળીને સૌ કોઈની આંખો ભીની થઈ ગઈ છે. પરિવારની આર્થિક સ્થિતિ સુધારવા અને આવક વધારવા માટે અભિષેક ગઈકાલે જ ઝોમાટો (Zomato) ડિલિવરી બોય તરીકે જોડાયો હતો. પરંતુ વિધિની વક્રતા તો જુઓ, નોકરીનો જે પહેલો દિવસ તેના જીવનમાં ખુશીઓ લાવવાનો હતો, એ જ દિવસ તેના જીવનનો અંતિમ દિવસ સાબિત થયો.
🚨પોલીસ તપાસ અને કાર્યવાહી
અકસ્માત સર્જનાર થાર ગાડી યુવતીઓ ચલાવી રહી હોવાનું જાણવા મળ્યું છે. ઘટના બાદ તરત જ અટલાદરા પોલીસ કાફલો સ્થળ પર પહોંચી ગયો હતો. પોલીસે મૃતદેહને પોસ્ટમોર્ટમ માટે હોસ્પિટલ ખસેડ્યો છે અને અકસ્માતે મોતનો ગુનો નોંધી આગળની કાર્યવાહી હાથ ધરી છે.
તપાસના મુદ્દા:
ટર્નિંગ પોઈન્ટ પર કારની ગતિ કેટલી હતી?
શું યુવતીઓ નશાની હાલતમાં હતી કે કેમ?
સીસીટીવી ફૂટેજ દ્વારા અકસ્માતના ચોક્કસ સંજોગોની તપાસ.
👮હાલ પોલીસે બંને યુવતીઓની અટકાયત કરી છે અને પૂછપરછ શરૂ કરી છે. વડોદરામાં વધતા જતા આવા અકસ્માતોએ ટ્રાફિક સુરક્ષા અને યુવા પેઢીની બેફામ ડ્રાઈવિંગ સામે અનેક સવાલો ઉભા કર્યા છે.
