સાવલીમાં કંપની સાથે લાખોની ઠગાઈ: એકાઉન્ટન્ટે પોતાના અને પત્નીના ખાતામાં રૂ. 89 લાખથી વધુ સગાં કર્યા

• રૂ. 95.65 લાખની ઉચાપત: સાવલીની મીના સર્કિટ કંપનીમાં એકાઉન્ટન્ટે લાખો રૂપિયાની હેરાફેરી કરી.
• પોતાના અને પત્નીના ખાતામાં નાણાં ટ્રાન્સફર: કંપનીના ખાતામાંથી રૂ. 89 લાખથી વધુ રકમ અન્ય ખાતાઓમાં ખસેડાઈ.
• સીએની તપાસથી ભાંડો ફૂટ્યો: ઓડિટ અને બેંક ખાતાની તપાસ દરમિયાન આચરવામાં આવેલી ગેરરીતિઓનો પર્દાફાશ થયો.
• પોલીસ કાર્યવાહી: સાવલી પોલીસ સ્ટેશનમાં BNS કલમ 316(4) હેઠળ ગુનો નોંધી આરોપીની શોધખોળ અને તપાસ હાથ ધરાઈ છે.

વડોદરા/સાવલી: વડોદરા જિલ્લાના સાવલી તાલુકાના વડદલા ગામે આવેલી ‘મીના સર્કિટ પ્રાઇવેટ લિમિટેડ’ કંપનીમાં નોકરી કરતા એકાઉન્ટન્ટે જ કંપની સાથે વિશ્વાસઘાત કરી રૂ. 95.65 લાખથી વધુની મસમોટી ઉચાપત કરી હોવાની ચોંકાવનારી ઘટના સામે આવી છે. આ મામલે કંપનીના એચ.આર. એન્ડ એડમિનિસ્ટ્રેશન મેનેજરની ફરિયાદના આધારે સાવલી પોલીસે ગુનો નોંધીને કાયદેસરની તપાસ શરૂ કરી છે.

🧐શું છે સમગ્ર કૌભાંડ?

પ્રાપ્ત વિગતો અનુસાર, વડદલા ગામે આવેલી મીના સર્કિટ પ્રાઇવેટ લિમિટેડ કંપનીમાં અલ્પેશકુમાર ચંદ્રકાન્ત પટેલ એકાઉન્ટન્ટ તરીકે ફરજ બજાવતો હતો. તેણે ગત તા. 28/12/2024 થી તા. 25/06/2026 દરમિયાન પોતાની સત્તા અને વિશ્વાસનો દુરુપયોગ કરી કંપનીના બેંક ખાતામાંથી પોતાના તેમજ પોતાની પત્ની બીનાબેન અલ્પેશભાઈ પટેલ અને અન્ય ખાતાઓમાં કુલ રૂ. 89,17,826/- ટ્રાન્સફર કરી લીધા હતા. આ ઉપરાંત, ટ્રાવેલિંગ એક્સપેન્સના રૂ. 1,54,559/- ની ઉચાપત કરવા ઉપરાંત ખોટા વાઉચરો બનાવી રોકડા રૂ. 7,43,451/- એમ કુલ રૂ. 98,15,836/- ની ઉચાપત કરી હતી. જેમાંથી તેણે રૂ. 2,50,000/- કંપનીના ખાતામાં પરત જમા કરાવ્યા હતા, આમ કુલ રૂ. 95,65,836/- ની રકમનો અંગત ફાયદા માટે દુરુપયોગ કર્યો હતો.

સીએ (CA) ની તપાસમાં પર્દાફાશ

ઘટના અંગે કંપનીના સીએ (Chartered Accountant) દ્વારા ગત તા. 04/09/2026 ના રોજ કંપનીના બેંક એકાઉન્ટની ઝીણવટભરી તપાસ કરવામાં આવી હતી, જેનો વિગતવાર રિપોર્ટ સોંપતા એકાઉન્ટન્ટ અલ્પેશ પટેલની આ તમામ ગેરરીતિઓ સ્પષ્ટ થઈ હતી.

આ મામલે સાવલી પોલીસ સ્ટેશનમાં પાર્ટ એ ગુ.ર.નં. 11197047260767/2026 ભારતીય ન્યાય સંહિતા (BNS) 2026 ની કલમ 316(4) મુજબ ગુનો નોંધવામાં આવ્યો છે. મૂળ હાલોલના અને હાલ ન્યુ કારેલીબાગ, સયાજીપુરા, વડોદરા ખાતે રહેતા આરોપી અલ્પેશકુમાર ચંદ્રકાન્ત પટેલ સામે પીએસઆઈ વી.એ. પરમાર દ્વારા આગળની તપાસ હાથ ધરવામાં આવી છે.