વડોદરા જીલ્લાના ડેસર તાલુકાના ઇંટવાડ ગામે મહીસાગર નદીમાં નાહવા પડેલા વડોદરાના યુવકો પૈકી એક યુવક ધસમસતા પાણીમાં તણાઈ ગયો હતો. ગત સાંજે બનેલી ઘટના બાદ સ્થાનિક તરવૈયાઓ તેમજ NDRFની ટીમ દ્વારા ડૂબી ગયેલા યુવકની શોધખોળ શરુ કરવામાં આવી હતી. જેમાં આજે ભારે જહેમતે યુવકનો મૃતદેહ મળી આવ્યો હતો.
વડોદરા શહેરના માંજલપુર વિસ્તારમાં રહેતો મનીષ લક્ષ્મણભાઈ સોલંકી ગત રોજ મિત્રો સાથે ડેસર તાલુકાના ઇંટવાડ ગામે પસાર થતી મહીસાગર નદીમાં નાહવા માટે ગયો હતો. જ્યાં વહેતા પાણીમાં વધુ અંદર સુધી પહોચી જતા મનીષ સોલંકી તણાઈ ગયો હતો. મનીષ સાથે આવેલા તેના મિત્રોએ ગામમાં મદદ માંગતા સ્થાનિક તરવૈયાઓ મનીષને શોધવા નદીમાં ઉતર્યા હતા. જોકે સાંજ સુધી સફળતા નહિ મળતા NDRFને જાણ કરવામાં આવી હતી.
આજે સવારથી NDRF ની ટુકડીએ મનીષની શોધખોળ શરુ કરી હતી. જ્યાં ડેસર પોલીસ તેમજ મનીષ સોલંકીના પરિવારજનો પણ આવી પહોચ્યા હતા. જ્યાં બપોરે તેનો મૃતદેહ મળી આવતા પોસ્ટમોર્ટમ અર્થે ડેસર પ્રાથમિક આરોગ્ય કેન્દ્ર ખાતે મોકલી આપવામાં આવ્યો હતો.
