- AI સિસ્ટમ ખોરવાઈ: દરજીપુરા RTO ખાતે સર્વરમાં ખામી સર્જાતા AI ડ્રાઇવિંગ ટેસ્ટની પ્રક્રિયા અચાનક બંધ પડી ગઈ હતી.
- ફોટો કેપ્ચરિંગ ઠપ: સર્વર ડાઉન થવાને કારણે કેમેરાથી ફોટો લેવાની પ્રક્રિયા બંધ રહેતા ૩૫ જેટલા અરજદારો અટવાયા હતા.
- અરજદારોને હાલાકી: દૂર-દૂરથી આવેલા નાગરિકોને લાંબો સમય રાહ જોવી પડી હતી, જેનાથી અરજદારોમાં નારાજગી ફેલાઈ હતી.
- બપોર બાદ સુધારો: ટેકનિકલ ખામી દૂર થતાં બપોર બાદ ટેસ્ટ પ્રક્રિયા ફરીથી રાબેતા મુજબ શરૂ કરી દેવામાં આવી છે.
વડોદરા શહેરના દરજીપુરા ખાતે આવેલા RTO કચેરીમાં આજ રોજ ટેકનિકલ ખામીના કારણે અરજદારોને ભારે હાલાકીનો સામનો કરવો પડ્યો હતો. મળતી માહિતી મુજબ, દરજીપુરા RTOમાં કાર્યરત AI (આર્ટિફિશિયલ ઇન્ટેલિજન્સ) આધારિત ડ્રાઇવિંગ ટેસ્ટ સિસ્ટમ અચાનક ખોરવાઈ ગઈ હતી, જેના કારણે ઓનલાઇન અને ઓટોમેટેડ પ્રક્રિયામાં અવરોધ ઊભો થયો હતો.
સિસ્ટમના સર્વરમાં અચાનક ખામી સર્જાતા ડ્રાઇવિંગ ટેસ્ટ દરમિયાન અરજદારોના કેમેરાથી ફોટો લેવાની પ્રક્રિયા સંપૂર્ણપણે ઠપ થઈ ગઈ હતી. વડોદરા તેમજ આસપાસના દૂર-દૂરના ગામોમાંથી પોતાના ડ્રાઇવિંગ ટેસ્ટ માટે સવાર-સવારમાં પહોંચેલા આશરે 35 જેટલા અરજદારોને ટેસ્ટ આપવા માટે લાંબો સમય રાહ જોવી પડી હતી. ટેસ્ટ પ્રક્રિયા વચ્ચે જ અચાનક ટેકનિકલ સમસ્યા સર્જાતા અરજદારોમાં તંત્ર સામે રોષ અને નારાજગી જોવા મળી હતી. AI આધારિત આધુનિક ટ્રેકની આ ટેકનિકલ ખામીએ RTOની કામગીરી અને વ્યવસ્થા સામે ગંભીર સવાલો ખડા કર્યા છે.
જોકે, ઘટનાની જાણ થતાં જ ટેકનિકલ ટીમે ત્વરિત કામગીરી હાથ ધરી હતી અને બપોર બાદ આ ટેકનિકલ સમસ્યાને સફળતાપૂર્વક દૂર કરી દીધી હતી. સમસ્યા ઉકેલાયા બાદ ડ્રાઇવિંગ ટેસ્ટની પ્રક્રિયા ફરીથી રાબેતા મુજબ શરૂ કરવામાં આવી હતી, જેનાથી રાહતનો શ્વાસ લીધો હતો.
