ગુજરાતના રાજ્યપાલ આચાર્ય દેવવ્રતજીએ શિનોરના બાવળીયા ગામે ગૌશાળા અને પ્રાકૃતિક ખેતીની મુલાકાત લીધી

ગુજરાતના રાજ્યપાલ આદરણીય આચાર્ય દેવવ્રતજીએ વડોદરા જિલ્લાના શિનોર તાલુકાના બાવળીયા ગામે 🐄 ગૌપાલન અને 🌿પ્રાકૃતિક ખેતીની પ્રવૃત્તિઓનું નિરીક્ષણ કર્યું હતું. તેમણે ચૌહાણ વનરાજસિંહ દિલીપસિંહની ગૌશાળાની મુલાકાત લીધી અને ખેડૂતોને પ્રાકૃતિક ખેતી માટે માર્ગદર્શન આપ્યું હતું.

🐮 ગૌશાળા નિરીક્ષણ અને માર્ગદર્શક સૂચનો

રાજ્યપાલશ્રીએ ગૌશાળામાં સંવર્ધિત આશરે 150 દેશી ગાયોનું નિરીક્ષણ કર્યું હતું અને સ્વયં ગાય દોહનનો સૌભાગ્ય પણ પ્રાપ્ત કર્યો હતો.

• ગૌશાળામાં દૈનિક 150 લીટરથી વધુ દૂધનું ઉત્પાદન થતું હોવાની જાણકારી મેળવીને તેમણે ઉત્પાદનક્ષમતા વધારવા માટે સંચાલક શ્રી વનરાજસિંહને માર્ગદર્શક સૂચનો આપ્યા હતા.
• ગાયોના આરોગ્ય જળવાઈ રહે તે માટે તેમણે નિયમિત ચિકિત્સા તપાસ, પોષણયુક્ત આહાર, પ્રાકૃતિક ઔષધિઓનો ઉપયોગ અને વૈજ્ઞાનિક સંચાલન પદ્ધતિઓ અપનાવવાની સલાહ આપી હતી.
• રાજ્યપાલશ્રીએ ગૌશાળા સંચાલક પરિવારની સેવાભાવનાની પ્રશંસા કરી હતી.

🌾 પ્રાકૃતિક ખેતીના મોડેલનું નિરીક્ષણ

રાજ્યપાલ આચાર્ય દેવવ્રતજીએ બાવળીયા ગામના પ્રાકૃતિક ખેતી કરતા ખેડૂતના ખેતરમાં જઈને પાકોની સ્થિતિ અને પદ્ધતિઓ વિશે વિસ્તૃત માહિતી મેળવી હતી.

• તેમણે ભારપૂર્વક જણાવ્યું હતું કે પ્રાકૃતિક ખેતીથી જમીનની ઉર્વરતા વધે છે, ઉત્પાદન ખર્ચમાં ઘટાડો થાય છે અને શુદ્ધ-સ્વસ્થ અનાજ પ્રાપ્ત થાય છે.
  
• ત્રણ એકર વિસ્તારમાં પ્રાકૃતિક ખેતી કરતા ખેડૂતોએ પંચતરીય મોડલ અંગે વિગતવાર માહિતી આપી હતી. આ મોડલમાં આંબા, નાળિયેર, સરગવો, કેળા, પપૈયા, મોસંબી તેમજ શાકભાજીનું સંયુક્ત ઉત્પાદન લેવાય છે, જે જમીનનું સજીવતાવર્ધન કરે છે અને ખેતીની આવકમાં વધારો કરે છે.
  
• ખેડૂતોએ પાણી સંચાલન, મલ્ચિંગ, જીવામૃત, ગ્રીન મેનોરિંગ સહિતના પ્રાકૃતિક ઉપાયો અપનાવીને ઓછા ખર્ચે વધુ ઉપજ મેળવવાના પોતાના અનુભવો રજૂ કર્યા હતા.

👉રાજ્યપાલશ્રીએ ગામના ખેડૂતોએ અપનાવેલી પરંપરાગત કૃષિ પદ્ધતિઓ, ગૌશાળા સંચાલન અને પ્રાકૃતિક ખેતીના વ્યાપને પ્રશંસનીય ગણાવ્યા હતા. આ મુલાકાત દરમિયાન આત્મા પ્રોજેક્ટના અધિકારીઓ અને ગામના ખેડૂતભાઈઓ ઉપસ્થિત રહ્યા હતા.