સ્થળ: ડભોઈ, વડોદરા
👉 મુખ્ય મુદ્દો: સુરક્ષા ઉપકરણો વગર કામગીરી અને પૂર્વ જાણ વગર વીજ કાપ
- ડભોઈમાં MGVCLનો ‘રામ ભરોસે’ વહીવટ: 20 ફૂટ ઊંચા થાંભલા પર સુરક્ષા વગર લટકતા શ્રમિકો!
- ન હેલ્મેટ, ન સેફ્ટી બેલ્ટ: શું તંત્ર કોઈ મોટી દુર્ઘટનાની રાહ જોઈ રહ્યું છે?
- જાણ કર્યા વગર 3 કલાક સુધી પાવર કટ, વેપારીઓ અને રહીશોમાં ભારે રોષ.
- MGVCL લાઈનમેનનો ઉદ્ધત જવાબ – “આ તો કોન્ટ્રાક્ટરની જવાબદારી!”
ડભોઈ: ડભોઈ શહેરમાં MGVCL (મધ્ય ગુજરાત વીજ કંપની લિમિટેડ)ની ગંભીર બેદરકારી સામે આવી છે. શહેરના જનતાનગર પાસે આવેલા માર્યા કોમ્પ્લેક્સ નજીક આજે વીજ વાયર બદલવાની કામગીરી દરમિયાન સુરક્ષાના નિયમોના સરેઆમ ધજાગરા ઉડતા જોવા મળ્યા હતા.
જીવના જોખમે કામગીરી: સ્થળ પર જોવા મળ્યું હતું કે, ખાનગી કોન્ટ્રાક્ટરના માણસો 15 થી 20 ફૂટ ઊંચા વીજ થાંભલા પર ચઢીને કામ કરી રહ્યા હતા. આશ્ચર્યની વાત એ છે કે, આ શ્રમિકો પાસે નહોતો કોઈ સેફ્ટી બેલ્ટ કે નહોતું માથા પર હેલ્મેટ. કોઈ પણ પ્રકારની સુરક્ષા પાંખ વગર જીવના જોખમે વીજ લાઈન પર કામ કરતા આ શ્રમિકો જોઈને
🚻 સ્થાનિકો પણ ફફડી ઉઠ્યા હતા.
વેપારીઓ અને રહીશો પરેશાન: આ કામગીરીને પગલે વિસ્તારમાં કોઈ પણ પૂર્વ સૂચના આપ્યા વગર 2 થી 3 કલાક સુધી વીજ પુરવઠો ખોરવી નાખવામાં આવ્યો હતો. બપોરના સમયે અચાનક વીજળી ગુલ થઈ જતા સ્થાનિક રહીશો અને ખાસ કરીને વેપારીઓને ભારે હાલાકીનો સામનો કરવો પડ્યો હતો. જનતાનો આક્ષેપ છે કે, તંત્ર દ્વારા આવી કામગીરી પહેલા કોઈ જાણ કરવામાં આવતી નથી.
જવાબદારીમાંથી હાથ ઊંચા કરતા અધિકારીઓ: જ્યારે આ મામલે સ્થળ પર હાજર MGVCLના લાઈનમેન એસ. એસ. પટેલને પૂછવામાં આવ્યું, ત્યારે તેમણે સંતોષકારક જવાબ આપવાને બદલે જવાબદારીમાંથી હાથ ઊંચા કરી લીધા હતા. તેમણે જણાવ્યું હતું કે, “આ કામગીરી કોન્ટ્રાક્ટર દ્વારા કરવામાં આવે છે અને સેફ્ટીની જવાબદારી પણ તેમની જ છે.”
લોકોમાં ઉઠતા સવાલો: જો કામ દરમિયાન કોઈ શ્રમિક સાથે દુર્ઘટના ઘટે, તો તેનો જવાબદાર કોણ?
- કોન્ટ્રાક્ટર નિયમોનું પાલન કરે છે કે નહીં, તે જોવાની જવાબદારી MGVCLના અધિકારીઓની નથી?
- વગર જાણ્યે વીજ કાપ ઝીંકી દેવો એ ગ્રાહકોના
🛑 અધિકારોનું ઉલ્લંઘન નથી?
હવે જોવાનું એ રહે છે કે, આ ગંભીર બેદરકારી બદલ ઉચ્ચ અધિકારીઓ કોન્ટ્રાક્ટર સામે કોઈ પગલાં ભરે છે કે પછી કોઈ મોટી હોનારતની રાહ જોવામાં આવશે.
