વડોદરા: સંસ્કારી નગરી વડોદરામાં સાયબર માફિયાઓનો આતંક સતત વધી રહ્યો છે. રાજકીય નેતાઓ અને ઉચ્ચ પોલીસ અધિકારીઓ બાદ હવે શહેરની પ્રતિષ્ઠિત SSG (સયાજી) હોસ્પિટલના સિનિયર ડોક્ટર પણ સાયબર ઠગાઈનો શિકાર બન્યા છે. ડો. રંજન ઐયરના નામે ફેક સોશિયલ મીડિયા એકાઉન્ટ બનાવીને ઠગોએ નાણાં પડાવવાનો ખેલ શરૂ કર્યો છે.
શહેરમાં અગાઉ અનેક નેતાઓ અને અધિકારીઓના નકલી એકાઉન્ટ બનાવીને પૈસા માંગવાના કિસ્સાઓ પ્રકાશમાં આવ્યા છે. આ કડીમાં હવે સયાજી હોસ્પિટલના જાણીતા ડોક્ટર રંજન ઐયરનું નામ જોડાયું છે. સાયબર માફિયાઓએ ડોક્ટરનો ફોટો અને વિગતો વાપરી સોશિયલ મીડિયા પર આબેહૂબ એકાઉન્ટ ઉભું કર્યું હતું.
🫵મિત્ર વર્તુળને શંકા ગઈ અને ભાંડો ફૂટ્યો
આ ફેક એકાઉન્ટ પરથી જ્યારે ડોક્ટરના નજીકના મિત્રો અને પરિચિતો પાસે અચાનક રૂપિયાની માંગણી કરવામાં આવી, ત્યારે તેઓને શંકા ગઈ હતી. મિત્રોએ તાત્કાલિક ડો. રંજન ઐયરનો સંપર્ક કર્યો અને આ સમગ્ર બનાવની જાણ કરી હતી.
ડોક્ટરે લોકોને કરી સાવધાન
પોતાના નામે નકલી એકાઉન્ટ ચાલતું હોવાનું જાણીને ડોક્ટર તરત જ હરકતમાં આવ્યા હતા. તેમણે સોશિયલ મીડિયાના માધ્યમથી તેમના તમામ સંપર્કોને સંદેશ પાઠવ્યો છે કે:
“કોઈ ભેજાબાજે મારા નામે ફેક એકાઉન્ટ બનાવ્યું છે. જો આ એકાઉન્ટ પરથી તમારી પાસે કોઈ રૂપિયાની માંગણી કરે, તો મહેરબાની કરીને છેતરાશો નહીં અને કોઈ પણ રકમ આપશો નહીં.”
👮 કાયદેસરની કાર્યવાહીની તજવીજ
ડો. રંજન ઐયરે આ મામલે ગંભીરતા દાખવી છે અને આ સાયબર ઠગ વિરુદ્ધ પોલીસ ફરિયાદ નોંધાવવાની પ્રક્રિયા હાથ ધરી છે. વડોદરા સાયબર ક્રાઈમ વિભાગ હવે આ એકાઉન્ટ કોણ ચલાવી રહ્યું છે અને તેનું IP એડ્રેસ ક્યાંનું છે તેની તપાસ કરશે.
