કોરોના બાદ હવે દેશ પર ફરી એક ઘાતક વાયરસનું સંકટ મંડરાઈ રહ્યું છે. પશ્ચિમ બંગાળના ઉત્તર ૨૪ પરગણા જિલ્લાના બારાસાતમાં નિપાહ વાયરસના બે શંકાસ્પદ કેસ સામે આવતા સમગ્ર તંત્રમાં દોડધામ મચી ગઈ છે. એક ખાનગી હોસ્પિટલમાં ફરજ બજાવતી બે નર્સ અત્યારે જીવન-મરણ વચ્ચે ઝોલા ખાઈ રહી છે.
📍ઘટનાની મુખ્ય વિગતો
- ક્યાં નોંધાયા કેસ?: બારાસાતની એક ખાનગી હોસ્પિટલમાં.
- દર્દી કોણ છે?: એક મહિલા અને એક પુરુષ નર્સ (બંને એક જ હોસ્પિટલમાં કાર્યરત).
- વર્તમાન સ્થિતિ: બંને દર્દીઓની હાલત અત્યંત નાજુક છે અને તેમને વેન્ટિલેટર પર રાખવામાં આવ્યા છે.
- તપાસ: પ્રાથમિક તપાસમાં નિપાહના લક્ષણો જણાતા સેમ્પલ પુષ્ટિ માટે NIV પુણે મોકલવામાં આવ્યા છે.
🛑કેન્દ્ર અને રાજ્ય સરકાર એક્શન મોડમાં
આ ઘટનાની ગંભીરતાને જોતા કેન્દ્રીય આરોગ્ય મંત્રી જે.પી. નડ્ડાએ પશ્ચિમ બંગાળના મુખ્યમંત્રી મમતા બેનર્જી સાથે ટેલિફોનિક વાતચીત કરી છે.
- નેશનલ જોઈન્ટ આઉટબ્રેક રિસ્પોન્સ ટીમ: કેન્દ્ર દ્વારા નિષ્ણાંતોની ટીમ બંગાળ રવાના કરવામાં આવી છે.
- કોન્ટેક્ટ ટ્રેસિંગ: નર્સના સંપર્કમાં આવેલા તમામ લોકોની ઓળખ કરી તેમને હોમ આઈસોલેશનમાં રાખવાની પ્રક્રિયા શરૂ કરાઈ છે.
- હાઈ એલર્ટ: મિદનાપુર, બર્ધમાન અને નાદિયા જેવા જિલ્લાઓમાં મેડિકલ ઓફિસરોની તાકીદની બેઠકો બોલાવવામાં આવી છે.
⚠️નિપાહ વાયરસ: કેમ છે આટલો ખતરનાક?
નિપાહ વાયરસ મુખ્યત્વે ચામાચીડિયા (Fruit Bats) દ્વારા ફેલાય છે. તે સંક્રમિત ફળો, પશુઓ કે માનવ સંપર્ક દ્વારા ફેલાઈ શકે છે. આ વાયરસમાં મૃત્યુદર 70% થી વધુ હોવાથી તેને ‘સાયલન્ટ કિલર’ તરીકે જોવામાં આવે છે.
🫵તંત્રની અપીલ:
બંગાળના મુખ્ય સચિવ નંદિની ચક્રવર્તીએ લોકોને ગભરાવાને બદલે સાવચેતી રાખવા અપીલ કરી છે. જો કોઈને અચાનક તાવ, માથાનો દુખાવો કે શ્વાસ લેવામાં તકલીફ જેવા લક્ષણો જણાય, તો તાત્કાલિક હોસ્પિટલનો સંપર્ક કરવો.
