વેનેઝુએલા પર અમેરિકાનો મોટો હુમલો? કારાકાસમાં શ્રેણીબદ્ધ વિસ્ફોટ અને ઈમરજન્સી

કારાકાસ/વોશિંગ્ટન: લેટિન અમેરિકન દેશ વેનેઝુએલામાં અત્યારે ભારે અફરાતફરીનો માહોલ છે. શનિવારની વહેલી સવારે રાજધાની કારાકાસ સાત પ્રચંડ વિસ્ફોટોથી ધ્રૂજી ઉઠ્યું હતું. આ ઘટના બાદ પ્રમુખ નિકોલસ માદુરોએ દેશમાં નેશનલ ઈમરજન્સી જાહેર કરી છે અને સીધો જ અમેરિકા પર સૈન્ય હુમલાનો આરોપ લગાવ્યો છે.

📍મુખ્ય વિગતો:

• 7 મોટા વિસ્ફોટો: કારાકાસના દક્ષિણ ભાગમાં એક મોટા સૈન્ય બેઝની આસપાસ સાત ધડાકા થયા હતા. આ વિસ્ફોટો એટલા પ્રચંડ હતા કે આખું શહેર ધ્રૂજી ઉઠ્યું હતું.
• વીજળી ગુલ: વિસ્ફોટો બાદ શહેરના અનેક વિસ્તારોમાં અંધારપટ છવાઈ ગયો હતો. સૈન્ય બેઝની આસપાસનો પાવર સપ્લાય સંપૂર્ણપણે ઠપ થઈ ગયો છે.
• લડાકૂ વિમાનો: સ્થાનિક લોકોએ દાવો કર્યો છે કે વિસ્ફોટો સમયે આકાશમાં નીચી ઉડાન ભરતા લડાકૂ વિમાનો જોવા મળ્યા હતા.
• ટ્રમ્પનો દાવો: લેટેસ્ટ અહેવાલો અનુસાર, અમેરિકી રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર દાવો કર્યો છે કે અમેરિકાએ વેનેઝુએલામાં મોટા પાયે હુમલા કર્યા છે અને નિકોલસ માદુરો તથા તેમની પત્નીને કસ્ટડીમાં લઈ દેશની બહાર લઈ જવામાં આવ્યા છે.

🧐 વેનેઝુએલાનો અમેરિકા પર આક્ષેપ

માદુરો સરકારે સત્તાવાર નિવેદન બહાર પાડીને આ હુમલાને ‘અમેરિકી સૈન્ય આક્રમકતા’ ગણાવી છે. સરકારનો આરોપ છે કે:

• અમેરિકાએ માત્ર કારાકાસ જ નહીં, પરંતુ મીરાંડા, અરગુઆ અને લા ગુઈરા જેવા શહેરોમાં પણ હવાઈ હુમલા કર્યા છે.
• આ હુમલા પાછળનો હેતુ વેનેઝુએલાના વિશાળ તેલ ભંડાર અને કુદરતી સંસાધનો પર કબજો કરવાનો છે.
• સરકારે નાગરિકોને ‘મોબિલાઈઝેશન’ (એકત્ર થવા) અને પ્રતિકાર કરવા અપીલ કરી છે.

🤝 કોલંબિયા અને ક્યુબા વેનેઝુએલાના સમર્થનમાં
આ ઘટના બાદ લેટિન અમેરિકન દેશોમાં તણાવ વધ્યો છે:

• કોલંબિયા: પ્રમુખ ગુસ્તાવો પેટ્રોએ આને સંયુક્ત રાષ્ટ્રના નિયમોનું ઉલ્લંઘન ગણાવી UNની તાત્કાલિક બેઠક બોલાવવા માંગ કરી છે.
• ક્યુબા: પ્રમુખ મિગુએલ ડિયાઝ કેનેલે આને ‘ગુનાહિત આતંકવાદ’ ગણાવીને આંતરરાષ્ટ્રીય સમુદાયને અમેરિકાનો વિરોધ કરવા હાકલ કરી છે.

⚠️ તણાવનું મુખ્ય કારણ: ડ્રગ્સ અને ઓઈલ

છેલ્લા કેટલાક સમયથી બંને દેશો વચ્ચે યુદ્ધ જેવી સ્થિતિ હતી:

• અમેરિકાએ વેનેઝુએલા પર ‘નાર્કો-ટેરરિઝમ’ (ડ્રગ્સ આતંકવાદ) ફેલાવવાનો આરોપ લગાવ્યો હતો.
• સપ્ટેમ્બર મહિનાથી અમેરિકી નૌસેનાએ કેરેબિયન સમુદ્રમાં વેનેઝુએલાના ઓઈલ જહાજો અને ડ્રગ્સની હેરાફેરીની શંકાવાળી બોટો પર હુમલા શરૂ કર્યા હતા.
• નિકોલસ માદુરોએ ઈરાન સાથે પણ ગાઢ મિત્રતા કેળવી હતી, જે અમેરિકાને ખટકી રહ્યું હતું.

🫵 નોંધ: હાલમાં સ્થિતિ અત્યંત સંવેદનશીલ છે અને કારાકાસના આકાશમાં હજુ પણ ધુમાડાના ગોટા જોવા મળી રહ્યા છે. અમેરિકી સરકાર આ મામલે ટૂંક સમયમાં પત્રકાર પરિષદ કરી શકે છે.