વડોદરામાં ‘જળ’ કકળાટ: સયાજીગંજમાં દૂષિત પાણીના ત્રાસ વચ્ચે મહિલાઓએ માટલા ફોડી વ્યક્ત કર્યો રોષ

વડોદરા શહેરમાં સ્માર્ટ સિટીના દાવાઓ વચ્ચે પીવાના પાણીની વિકટ સમસ્યા સામે આવી રહી છે. શહેરના સયાજીગંજ વિસ્તારના પરશુરામ ભઠ્ઠા પાસે આવેલી નવી નગરીમાં છેલ્લા ઘણા સમયથી દૂષિત અને ગંધાતું પાણી આવતા સ્થાનિક રહીશોનો પ્રચંડ આક્રોશ ફાટી નીકળ્યો છે. આજે મોટી સંખ્યામાં એકત્ર થયેલી મહિલાઓએ ‘પાણી નહીં તો વોટ નહીં’ ના સૂત્રોચ્ચાર સાથે માટલા ફોડી તંત્ર વિરુદ્ધ ઉગ્ર વિરોધ પ્રદર્શન કર્યું હતું.

વડોદરા: ‘હર ઘર નળ’ અને ‘નળ સે જલ’ જેવી સરકારી યોજનાઓ વડોદરાના કેટલાક વિસ્તારોમાં માત્ર કાગળ પર હોય તેવું જણાઈ રહ્યું છે. સયાજીગંજ વિસ્તારમાં પરશુરામ ભઠ્ઠા નજીકની નવી નગરીમાં પીવાના પાણીની ગંભીર સમસ્યાએ સ્થાનિકોની ધીરજ ખૂટવી છે.

• ગંદા પાણીનો ત્રાસ: સ્થાનિકોનો આક્ષેપ છે કે નળમાં જે પાણી આવે છે તે અત્યંત ડહોળું, ગંધાતું અને પીવાલાયક હોતું નથી. વારંવાર રજૂઆતો કરવા છતાં તંત્ર દ્વારા કોઈ નક્કર પગલાં લેવામાં આવ્યા નથી.
• વોટિંગ બહિષ્કારની ચીમકી: રોષે ભરાયેલા લોકોએ સ્પષ્ટ શબ્દોમાં ચેતવણી આપી છે કે જો તંત્ર દ્વારા વહેલી તકે શુદ્ધ અને પૂરતા પ્રમાણમાં પાણી પૂરું પાડવામાં નહીં આવે, તો આગામી સમયમાં તેઓ ચૂંટણીનો બહિષ્કાર કરશે. “પાણી નહીં તો વોટ નહીં” ના બેનરો અને સૂત્રોચ્ચારથી સમગ્ર વિસ્તાર ગુંજી ઉઠ્યો હતો.
• વિરોધ પ્રદર્શન: વિરોધના પ્રતીક રૂપે મહિલાઓએ રસ્તા પર ઉતરી માટલા ફોડીને પાલિકા તંત્રની નિષ્ક્રિયતા પર પ્રહાર કર્યા હતા.

🧐સ્થાનિક રહીશનું નિવેદન:

“અમે ટેક્સ ભરીએ છીએ છતાં અમને પીવા માટે ગટર જેવું ગંદુ પાણી મળે છે. બાળકો બીમાર પડી રહ્યા છે. જો તંત્રને અમારી પરેશાની નથી દેખાતી, તો અમને પણ નેતાઓ નથી જોઈતા. પાણી નહીં આપો તો અમે વોટ પણ નહીં આપીએ.”

🫵શહેરમાં ઠેકઠેકાણે પાણીની પાઈપલાઈનમાં ભંગાણ અથવા મિક્સિંગની ફરિયાદો વધી રહી છે ત્યારે સયાજીગંજની આ ઘટના પાલિકા તંત્ર માટે જગાડનારો કિસ્સો છે. હવે જોવાનું એ રહે છે કે આ આક્રોશ બાદ તંત્ર જાગે છે કે પછી જનતા હજુ પણ ટીપે-ટીપે પાણી માટે વલખાં મારતી રહેશે.