વડોદરામાં ‘વિકાસ’ પાતાળમાં ઉતર્યો: સૂસેન-મકરપુરા રોડ પર નવનિર્મિત માર્ગમાં મસમોટો ભૂવો

• કામગીરીના લીરેલીરા: માત્ર 2-3મહિના પહેલા બનેલી વરસાદી લાઇન પાસે પડ્યો મોટો ભૂવો; ગુણવત્તા સામે ઉઠ્યા સવાલો.
• જોખમી સવારી: મુખ્ય માર્ગ પર ભૂવો પડતા વાહન વ્યવહાર ખોરવાયો; રાત્રિના સમયે અકસ્માતનો મોટો ભય.
• નેતાઓનું નફ્ફટાઈભર્યું વલણ: વોર્ડ નં. 19 ના કાઉન્સિલર પાસે રજૂઆત કરવા ગયેલા રહીશોને મળ્યો ઉદ્ધતાઈભર્યો જવાબ.
• ચોમાસું માથે છતાં તંત્ર નિંદ્રામાં: ‘વિકસિત વડોદરા’માં પ્રશાસનની ઘોર બેદરકારી; શું જનતાના જીવ જોખમાશે ત્યારે જાગશે VMC?

વડોદરા: સ્માર્ટ સિટી વડોદરામાં પ્રિ-મોન્સૂન કામગીરીના દાવાઓ વચ્ચે ભ્રષ્ટાચારના ભૂવાઓ ફરી એકવાર સપાટી પર આવ્યા છે. શહેરના સૂસેન-મકરપુરા રોડ પર હજુ માંડ 2 થી 3 મહિના પહેલા જ વરસાદી લાઇન નું નવું કામ પૂર્ણ કરવામાં આવ્યું હતું, ત્યાં આજે રસ્તો બેસી જતાં એક મોટો ભૂવો પડ્યો છે. આ ઘટનાને પગલે કોર્પોરેશનની કામગીરીની ગુણવત્તા પર ગંભીર સવાલો ઉઠી રહ્યા છે.

👉ભ્રષ્ટાચારનો ખદબદતો કાદવ:

સ્થાનિકોનો આરોપ છે કે, કોન્ટ્રાક્ટર અને અધિકારીઓની મિલીભગતને કારણે અત્યંત હલકી કક્ષાનું મટીરિયલ વાપરવામાં આવ્યું છે. જે કામગીરી વર્ષો સુધી ટકવી જોઈએ, તે એક સીઝન પણ કાઢી શકી નથી. ભરચક ટ્રાફિક ધરાવતા આ માર્ગ પર ભૂવો પડવાને કારણે વાહનચાલકોમાં ભયનો માહોલ છે. વારંવારની રજૂઆતો છતાં તંત્ર દ્વારા માત્ર થીગડા મારવાની કામગીરી કરાતી હોવાથી રહીશોમાં ભારે આક્રોશ છે.

🤨લોકપ્રતિનિધિની બેજવાબદારી:

સૌથી ચોંકાવનારી બાબત એ છે કે, જ્યારે જાગૃત નાગરિકો આ સમસ્યા લઈને વોર્ડ નંબર 19 ના સ્થાનિક કાઉન્સિલર પાસે પહોંચ્યા, ત્યારે તેમને સહકાર આપવાને બદલે કાઉન્સિલરે ઉદ્ધતાઈભર્યું વર્તન કર્યું હોવાનું સામે આવ્યું છે. જનતાના મતે, ચૂંટણી સમયે મતો માંગવા આવતા નેતાઓ અત્યારે જનતાની સુરક્ષાના પાયાના પ્રશ્ને મૌન સેવી રહ્યા છે અથવા તો નફ્ફટાઈ દાખવી રહ્યા છે.

🫵ચોમાસું બિલકુલ માથે છે, વડોદરાના ખૂણેખૂણે VMC ના ખોદકામ ચાલી રહ્યા છે. ત્યારે સવાલ એ થાય છે કે શું આ ‘વિકસિત વડોદરા’ માં નાગરિકોએ જીવના જોખમે રસ્તા પર નીકળવું પડશે? શું તંત્ર કોઈ મોટી દુર્ઘટનાની રાહ જોઈ રહ્યું છે?