- રોજગારી પર સંકટ: ઉદલપુરમાં ખોટી દિશામાં બ્રિજ બનતો હોવાનો આક્ષેપ; સ્થાનિક દુકાનદારોના ધંધા-રોજગાર ઠપ્પ થવાની ભીતિ.
- મૂળ જગ્યાએ જ બ્રિજ બનાવો: જૂની જગ્યા છોડી નવી જગ્યાએ બ્રિજ બનાવવાની હિલચાલ સામે રહીશોનો સખત વિરોધ.
- ઉગ્ર આંદોલનનું એલાન: તંત્ર સામે સૂત્રોચ્ચાર કરી આત્મવિલોપનની અપાઈ ચીમકી; વેપારીઓમાં ભારે રોષ.
- આર્થિક ફટકો: નવી જગ્યાએ બ્રિજ બનવાથી નાના વેપારીઓને નવા કોમ્પ્લેક્સમાં દુકાનો ખરીદવી પોસાય તેમ નથી.
વડોદરા: વડોદરા શહેરની ભાગોળે આવેલા ઉદલપુર ગામ પાસે નવા બની રહેલા બ્રિજની ડિઝાઈન અને દિશાને લઈને સ્થાનિકો અને વહીવટી તંત્ર સામસામે આવી ગયા છે. ઉદલપુર ગામે નવો બ્રિજ મૂળ જગ્યાના બદલે બીજી જગ્યાએ બનાવવાની કાર્યવાહી શરૂ થતા જ સ્થાનિક દુકાનદારો અને ગ્રામજનોએ મેદાનમાં આવીને વિરોધ પ્રદર્શન કર્યું છે.
❓શું છે વેપારીઓની વેદના?
સ્થાનિક વેપારીઓનો આક્ષેપ છે કે વર્ષોથી તેઓ જે જગ્યાએ ધંધો કરી રહ્યા છે, ત્યાંથી બ્રિજની દિશા બદલવામાં આવશે તો તેમનો વર્ષો જૂનો વ્યવસાય પડી ભાંગશે. નવી જગ્યાએ બ્રિજ બનાવવાથી ત્યાં નવા કોમર્શિયલ કોમ્પ્લેક્સ ઉભા થશે, જ્યાં મોંઘા ભાવની દુકાનો ખરીદવી સામાન્ય વેપારીઓ માટે અશક્ય છે. આ હિલચાલથી નાના વેપારીઓ પાયમાલ થઈ જશે તેવી દહેશત વ્યક્ત કરવામાં આવી છે.
🧐આરપારની લડાઈ:
આજે મોટી સંખ્યામાં એકઠા થયેલા સ્થાનિકોએ તંત્ર વિરુદ્ધ ભારે સૂત્રોચ્ચાર કર્યા હતા. વેપારીઓએ ચીમકી ઉચ્ચારી છે કે જો બ્રિજને તેની મૂળ જગ્યાએ જ બનાવવામાં નહીં આવે, તો તેઓ આત્મવિલોપન જેવા આકરા પગલાં ભરતા પણ અચકાશે નહીં. સ્થાનિકોનું કહેવું છે કે વિકાસના નામે ગરીબ અને મધ્યમ વર્ગના વેપારીઓના પેટ પર લાત મારવાનું બંધ કરવામાં આવે.
🫵હવે જોવાનું એ રહેશે કે તંત્ર સ્થાનિકોની આ વ્યાજબી માંગને ધ્યાને લઈ બ્રિજની ડિઝાઈનમાં કોઈ ફેરફાર કરે છે કે પછી વેપારીઓનો આ ઉગ્ર વિરોધ કોઈ અઘટિત ઘટના તરફ દોરી જાય છે
