વડોદરા: જે ગોડાઉનમાં મજૂરી કરતા હતા ત્યાં જ હાથફેરો કર્યો, ક્રાઈમ બ્રાન્ચે બે શખ્સોને દબોચ્યા

વડોદરા:શહેરમાં મિલકત સંબંધી ગુનાઓ અટકાવવા અને વણઉકેલાયેલા કેસોને ઉકેલવા માટે વડોદરા પોલીસ કમિશનર તથા ઉચ્ચ પોલીસ અધિકારીઓની સૂચના મુજબ ક્રાઈમ બ્રાન્ચની ટીમો સતત કાર્યરત છે. આ દરમિયાન, જામ્બુવા ચોકડી પાસે આવેલ એક ગોડાઉનમાંથી 400 કિલો કેબલની ચોરી કરનાર બે શખ્સોને મુદ્દામાલ સાથે ઝડપી પાડી મકરપુરા પોલીસ સ્ટેશનના ગુનાનો ભેદ ઉકેલી નાખવામાં આવ્યો છે.

🚨પેટ્રોલિંગ દરમિયાન એકતાનગર નાકા પાસેથી થઈ ધરપકડ

​ક્રાઈમ બ્રાન્ચની ટીમ શહેરના વિસ્તારમાં પેટ્રોલિંગમાં હતી, ત્યારે મળેલી ચોક્કસ બાતમીના આધારે એકતાનગર નાકા પાસેથી બે શખ્સોની અટકાયત કરવામાં આવી હતી:

1. સાહીલ ઉર્ફે ભાઇજાન દીલાવરખાન પઠાણ (રહે. એકતાનગર, વડોદરા)
2. ઈમ્તીયાઝ ઉર્ફે પી.કે. અનવર સૈયદ (રહે. આંબેડકરનગર, આજવા રોડ, વડોદરા)

🧐ચોરીની મોડસ ઓપરેન્ડી: મજૂર જ નીકળ્યા તસ્કર

પોલીસની સઘન પૂછપરછમાં ચોંકાવનારી વિગતો સામે આવી છે. પકડાયેલા બંને આરોપીઓ જામ્બુવા ચોકડી પાસેના નેશનલ હાઈવે પર આવેલ ગોડાઉનમાં મજૂરીકામ કરતા હતા. આર્થિક ફાયદા માટે તેઓએ છેલ્લા એક મહિનામાં ત્રણ અલગ-અલગ સમયે પ્લાસ્ટિક કવર વાળા 400 કિલો એલ્યુમિનિયમ કેબલની ચોરી કરી હતી.

♌પુરાવાનો નાશ કરવા કેબલ ઓગાળી નાખ્યા

​ચોરી કર્યા બાદ આરોપીઓએ આ કેબલ સ્ક્રેપના વેપારીને વેચી દીધા હતા. પોલીસે તપાસ કરતા જાણવા મળ્યું કે ભંગારના વેપારીએ કેબલના પડ પડાવી તેને ઓગાળી દીધા હતા અને એલ્યુમિનિયમની પાટો બનાવી દીધી હતી. પોલીસે સ્થળ પરથી:

• ​એલ્યુમિનિયમની પાટો (નંગ 41)
• ​કુલ વજન: 210 કિલો
• કિંમત: રૂ. 42,000/- નો મુદ્દામાલ કબજે કર્યો છે.

✍️મકરપુરા પોલીસ સ્ટેશનમાં નોંધાયો હતો ગુનો

આ કેબલ ચોરી અંગે મકરપુરા પોલીસ સ્ટેશનમાં BNS ની કલમ 303(2) મુજબ ગુનો નોંધાયેલ હતો. વડોદરા ક્રાઈમ બ્રાન્ચે આરોપીઓ અને મુદ્દામાલનો કબજો મેળવી વધુ તપાસ માટે મકરપુરા પોલીસને સોંપવાની તજવીજ હાથ ધરી છે.

🚨ઝડપાયેલ આરોપીઓ:

• ​સાહીલ ઉર્ફે ભાઇજાન દીલાવરખાન પઠાણ
• ​ઈમ્તીયાઝ ઉર્ફે પી.કે. અનવર સૈયદ