સાવલી : સેવા સદનમાં જ ‘તરસ્યા’ અરજદારો! ધોરણ 10-12 ના વિદ્યાર્થીઓ અને નાગરિકો પાણી માટે વલખાં મારવા મજબૂર

• સેવા સદનમાં પાણીની પોકાર: સાવલી તાલુકા સેવા સદનમાં પીવાના શુદ્ધ પાણીની સુવિધાના અભાવે હજારો નાગરિકો પરેશાન.
• જયેશ બાકરોલાની લાલ આંખ: તાલુકા પંચાયત સભ્ય અને એડવોકેટે પ્રાંત અધિકારી અને મામલતદારને પાઠવ્યું આવેદન.
• વિદ્યાર્થીઓની હાલાકી: પરિણામ બાદ દાખલાઓ કઢાવવા આવતા વિદ્યાર્થીઓની ભીડ; ભરગરમીમાં પાણી વિના રઝળપાટ.
• તંત્રને અલ્ટીમેટમ: સવારે 10 થી સાંજે 6 વાગ્યા સુધી પીવાના ઠંડા પાણીની વ્યવસ્થા કરવાની માંગ; વડોદરા કલેક્ટરને પણ કરાઈ રજૂઆત.

સાવલી: વડોદરા જિલ્લાના સાવલી તાલુકા સેવા સદનમાં વહીવટી કામકાજ માટે આવતા અરજદારો માટે પીવાના પાણીની સુવિધા એક મોટી સમસ્યા બની છે. હાલમાં ધોરણ 10-12ના પરિણામો જાહેર થતા દાખલાઓ મેળવવા માટે વિદ્યાર્થીઓ અને વાલીઓની ભારે ભીડ સેવા સદનમાં ઉમટી રહી છે. આ ગરમીમાં લોકો તરસ્યા રહેવા મજબૂર બનતા આખરે આ મુદ્દો ગરમાયો છે.

❓શું છે મામલો?

તાલુકા પંચાયતના સભ્ય અને એડવોકેટ જયેશ બાકરોલાએ કરેલી રજૂઆત મુજબ, સાવલી તાલુકા સેવા સદનમાં રોજ હજારો નાગરિકો વિવિધ કામકાજ અર્થે આવે છે. જોકે, અહીં પીવાના ઠંડા અને શુદ્ધ પાણીની પૂરતી સુવિધાનો ભારે અભાવ છે. કાળઝાળ ગરમીમાં અરજદારો પાણી માટે વલખાં મારી રહ્યા છે, તેમ છતાં તંત્ર દ્વારા કોઈ નક્કર પગલાં લેવામાં આવતા નથી.

🧐તંત્ર સામે આક્રોશ:

જયેશ બાકરોલાએ જણાવ્યું હતું કે, “સેવા સદન ખાતે આવતા નાગરિકો અને વિદ્યાર્થીઓ ભરઉનાળે તરસ્યા રહેવા મજબૂર છે, જે અત્યંત શરમજનક છે.” આ મામલે પ્રાંત અધિકારી અને મામલતદારને લેખિત રજૂઆત કરવામાં આવી છે. એટલું જ નહીં, આ સમસ્યાની નકલ વડોદરા કલેક્ટરને પણ મોકલી આપવામાં આવી છે. માંગ કરવામાં આવી છે કે સવારે 10 થી સાંજે 6 વાગ્યા સુધી કાયમી ધોરણે પીવાના ઠંડા પાણીની વ્યવસ્થા કરવામાં આવે.

🫵સરકારી કચેરીમાં જ્યારે નાગરિકો પોતાના હકના કામ માટે આવતા હોય, ત્યારે તેમને પીવાનું પાણી પણ ન મળે તે વહીવટી તંત્રની નિષ્ક્રિયતા સૂચવે છે. શું તંત્ર આ ગંભીર મુદ્દે તાત્કાલિક કાર્યવાહી કરશે, કે પછી નાગરિકોએ હજુ વધુ હાલાકી ભોગવવી પડશે?