સાવલીના પોઇચા ખાંડીમાં લોહિયાળ ખેલ: ફાર્મ હાઉસમાં ફાયરિંગથી એક યુવક લોહીલુહાણ

સાવલીનું પોઇચા ખાંડી ગામ ગોળીબારના અવાજથી ગાજ્યું!

• ભાજપ કિસાન મોરચાના અગ્રણીના ફાર્મ હાઉસ પર ફાયરિંગની ઘટના.
• અંગત અદાવત કે પ્રેમ પ્રકરણ? હુમલા પાછળના કારણો અંગે અનેક તર્ક-વિતર્ક.
• ઈજાગ્રસ્ત યુવક વડોદરાની SSG હોસ્પિટલમાં સારવાર હેઠળ.

વડોદરા જિલ્લાના સાવલી તાલુકામાંથી એક ચોંકાવનારા સમાચાર સામે આવી રહ્યા છે. સાવલીના પોઇચા ખાંડી ગામે એક ફાર્મ હાઉસમાં અંધાધૂંધ ફાયરિંગ થતા સમગ્ર પંથકમાં ચકચાર મચી ગઈ છે. આ ઘટનામાં એક વ્યક્તિને ગોળી વાગતા તેને ગંભીર હાલતમાં હોસ્પિટલ ખસેડવામાં આવ્યો છે.

સાવલી તાલુકાના ભાદરવા પોલીસ મથકની હદમાં આવતા પોઇચા ખાંડી ગામે મોડી રાત્રે લોહિયાળ ખેલ ખેલાયો છે. અહીં આવેલા એક ફાર્મ હાઉસમાં અચાનક ફાયરિંગ થતા અફરાતફરી મચી ગઈ હતી. પ્રાથમિક વિગતો મુજબ, 5થી વધુ શખ્સો ફાર્મ હાઉસમાં ઘૂસી આવ્યા હતા અને બોલાચાલી બાદ મામલો બિચક્યો હતો.

આ ઘર્ષણ દરમિયાન થયેલા ફાયરિંગમાં એક વ્યક્તિને હાથના ભાગે ગોળી વાગતા તે લોહીલુહાણ હાલતમાં ઢળી પડ્યો હતો. ઘટનાની જાણ થતા જ આસપાસના લોકો એકઠા થઈ ગયા હતા અને ઈજાગ્રસ્તને તાત્કાલિક સારવાર માટે વડોદરાની એસ.એસ.જી. (SSG) હોસ્પિટલ ખાતે ખસેડવામાં આવ્યો છે.

ઘટનાની ગંભીરતાને જોતા ભાદરવા પોલીસનો કાફલો તાત્કાલિક સ્થળ પર દોડી ગયો હતો. પોલીસની પ્રાથમિક તપાસમાં આ ફાયરિંગ પાછળ પ્રેમ પ્રકરણ અથવા જૂની અદાવત હોવાની આશંકા સેવાઈ રહી છે. જોકે, હજુ સુધી સત્તાવાર રીતે કોઈ કારણ સ્પષ્ટ થયું નથી. પોલીસે ફાર્મ હાઉસ અને આસપાસના સીસીટીવી ફૂટેજ મેળવી આરોપીઓને પકડવા માટે ચક્રો ગતિમાન કર્યા છે.

શું આ ફાયરિંગ આત્મરક્ષામાં કરવામાં આવ્યું હતું કે કોઈ પૂર્વઆયોજિત કાવતરું હતું? તે હવે પોલીસ તપાસ બાદ જ બહાર આવશે. હાલ તો આ ઘટનાએ જિલ્લામાં કાયદો અને વ્યવસ્થાની સ્થિતિ પર સવાલો ઉભા કર્યા છે.