હવાઈ મુસાફરી મોંઘી થઈ: એર ઇન્ડિયાએ ઝીંક્યો ‘ફ્યુઅલ સરચાર્જ’; ટિકિટના ભાવમાં ₹400 થી ₹18,000 સુધીનો તોતિંગ વધારો

નવી દિલ્હી/વડોદરા: મધ્ય-પૂર્વ (મિડલ ઈસ્ટ)માં ઈરાન અને ઈઝરાયલ વચ્ચે ચાલી રહેલા યુદ્ધની સીધી અસર હવે વિમાન મુસાફરો પર પડી છે. એર ઇન્ડિયા ગ્રૂપે આજે સ્થાનિક અને આંતરરાષ્ટ્રીય રૂટ પર ‘ફ્યુઅલ સરચાર્જ’ વધારવાની સત્તાવાર જાહેરાત કરી છે. એવિએશન ટર્બાઇન ફ્યુઅલ (ATF) ના ભાવમાં થયેલા વધારાને કારણે કંપનીએ આ બોજ મુસાફરો પર નાખ્યો છે.

❓કેમ વધ્યા ભાવ?

​એરલાઇન્સના જણાવ્યા મુજબ, યુદ્ધની સ્થિતિને કારણે માર્ચ 2026 માં વિમાનના બળતણના ભાવ આસમાને પહોંચ્યા છે. વિમાનના સંચાલન ખર્ચમાં 40% હિસ્સો માત્ર ફ્યુઅલનો હોય છે, તેથી કંપની પાસે ભાવ વધારવા સિવાય અન્ય કોઈ વિકલ્પ બચ્યો નથી.

🧐ક્યારથી અને કેટલો વધારો? (નવા દરોની વિગત)

આ વધારો મુખ્યત્વે ત્રણ અલગ-અલગ તબક્કામાં લાગુ કરવામાં આવશે:

તબક્કો-1 (12 માર્ચ 2026 થી અમલી)

• ​ડોમેસ્ટિક (ભારત): પહેલા કોઈ ચાર્જ નહોતો, હવે ₹399 વધુ ચૂકવવા પડશે.
• ​SAARC દેશો: ટિકિટમાં ₹399 નો વધારો.
• ​મિડલ ઈસ્ટ: 10 ડોલર (અંદાજે ₹900) નો વધારો.
• ​દક્ષિણ પૂર્વ એશિયા: 20 ડોલરનો વધારો (કુલ સરચાર્જ અંદાજે ₹5,400).
• ​આફ્રિકા: 30 ડોલરનો વધારો (કુલ સરચાર્જ અંદાજે ₹8,200).

તબક્કો-2 (18 માર્ચ 2026 થી અમલી)

• ​યુરોપ: 25 ડોલરનો વધારો (કુલ સરચાર્જ અંદાજે ₹11,000).
• ​ઉત્તર અમેરિકા (USA): 50 ડોલરનો વધારો (કુલ સરચાર્જ અંદાજે ₹18,000).
• ​ઓસ્ટ્રેલિયા: 50 ડોલરનો વધારો (કુલ સરચાર્જ અંદાજે ₹18,000).

👉કોને અસર નહીં થાય?

​મુસાફરો માટે થોડા રાહતના સમાચાર એ છે કે:

1. ​જે લોકોએ નવા દરો લાગુ થયા પહેલા ટિકિટ બુક કરાવી લીધી છે, તેમને વધારાનો ચાર્જ ચૂકવવો પડશે નહીં.
2. ​જોકે, જૂની ટિકિટમાં તારીખ કે રૂટ બદલાવશો તો નવા દરો મુજબ ચાર્જ લાગશે.
3. ​એર ઇન્ડિયા એક્સપ્રેસ ના મુસાફરો પર પણ હવે આ નવા નિયમો અને સરચાર્જ લાગુ થશે.

👉આગામી તૈયારી

​કંપની ટૂંક સમયમાં તબક્કા-3 ની જાહેરાત કરશે, જેમાં હોંગકોંગ, જાપાન અને દક્ષિણ કોરિયા જેવા દેશો માટે નવા દરો જાહેર કરવામાં આવશે.