અમરેલીમાં સિંહનો આતંક: લીલિયાના જંગલ વિસ્તારમાં સિંહના હુમલામાં વધુ એક યુવાનનું કરુણ મોત

• ઘટના: લીલિયાના અંટાળિયા નજીક જંગલ વિસ્તારમાં સિંહના હુમલામાં એક યુવાનનું મોત.
• પૃષ્ઠભૂમિ: કામ અર્થે જતા ત્રણ યુવકો રસ્તો ભૂલી જંગલમાં ઘૂસી ગયા હતા, જ્યાં સિંહે હુમલો કર્યો.
• આંકડાકીય ભય: અમરેલીમાં સવા મહિનામાં સિંહ હુમલાની 7 ઘટનાઓમાં 5 લોકોના મોત અને 2 લોકો ઈજાગ્રસ્ત.
• વન વિભાગની તપાસ: મૃતદેહને પીએમ અર્થે મોકલી અન્ય બે યુવકોની પૂછપરછ હાથ ધરાઈ.

અમરેલી: અમરેલી જિલ્લામાં સિંહોનો આતંક યથાવત છે. લીલિયાના અંટાળિયા નજીક આવેલા જંગલ વિસ્તારમાં સિંહ હુમલાની એક કમનસીબ ઘટનામાં એક યુવાનનું મોત નિપજ્યું છે. ફોન-પે કંપનીમાં કામ કરતા ત્રણ યુવકો રસ્તો ભૂલી જંગલ વિસ્તારમાં ઘૂસી જતાં આ ઘટના બની હોવાનું સામે આવ્યું છે.

❓શું હતી ઘટના?

મૃતક યુવાન સોહિલ રફીકભાઈ અને તેના બે સાથીદારો યશરાજ સિંહ તથા રેહાનભાઈ કામના અર્થે લુવારીયા જઈ રહ્યા હતા ત્યારે રસ્તો ભૂલીને જંગલના વીડી વિસ્તારમાં પહોંચી ગયા હતા. આ દરમિયાન સોહિલભાઈ લઘુશંકા માટે નીચે ઉતર્યા ત્યારે જંગલમાં લપાઈને બેઠેલા સિંહે તેમના પર અચાનક હુમલો કરી દીધો હતો, જેમાં તેમનું ઘટનાસ્થળે જ મોત નિપજ્યું હતું.

🚨વન વિભાગની તપાસ:

ઘટનાની જાણ થતાં વન વિભાગની ટીમ તુરંત દોડી આવી હતી. વન વિભાગે મૃતદેહને પીએમ અર્થે હોસ્પિટલ ખસેડ્યો છે અને અન્ય બે યુવકોને પૂછપરછ માટે દબોચી લીધા છે. યુવકોના દાવા મુજબ તેઓ કામ માટે જઈ રહ્યા હતા ત્યારે ભૂલથી રસ્તો ભટકી ગયા હતા, જોકે વન વિભાગ દ્વારા સમગ્ર મામલે ઊંડાણપૂર્વકની તપાસ શરૂ કરવામાં આવી છે.

🧐ચિંતાનો વિષય:

અમરેલી જિલ્લામાં સિંહ હુમલાની ઘટનાઓ ચિંતાજનક રીતે વધી રહી છે. છેલ્લા સવા મહિનામાં જ સિંહ હુમલાની 7 અલગ-અલગ ઘટનાઓ નોંધાઈ છે, જેમાં 5 લોકોએ પોતાનો જીવ ગુમાવ્યો છે. વારંવાર બનતી આવી ઘટનાઓને કારણે સ્થાનિક ગ્રામજનોમાં ભારે ભય ફેલાયો છે. તંત્ર દ્વારા હવે જંગલ વિસ્તારમાં માનવ અવરજવર રોકવા અને સુરક્ષા વધારવા માટે નક્કર પગલાં ભરવા ખૂબ જ જરૂરી બન્યા છે.