- જાંબુવા બ્રિજ પાસે વોચ: પીસીબી સ્ક્વોડે બાતમીના આધારે સાંકડા પુલ પાસે ઘેરાબંધી કરીને અર્ટિગા કારને દબોચી લીધી.
- 1,316 બોટલ જપ્ત: કારમાંથી ₹2,62,892ની કિંમતનો ભારતીય બનાવટનો વિદેશી દારૂ (IMFL) રિકવર.
- મોડસ ઓપરેન્ડીનો પર્દાફાશ: પોલીસને થાપ આપવા હાઈવે પર વારાફરતી ડ્રાઈવર બદલીને અને બાઈક પાઇલોટિંગ દ્વારા લવાતો હતો દારૂ.
- 2 સાગરીતો ફરાર: કિસનવાડીના નિરેન રાજપૂત અને અજય તડવીને પોલીસે વોન્ટેડ જાહેર કર્યા.
- રીઢો ગુનેગાર: પકડાયેલો આરોપી સન્ની ઉર્ફે બાબલો અગાઉ મારામારી અને પ્રોહિબિશન સહિત 11 ગુનાઓમાં સંડોવાયેલો છે અને પાસા પણ કાપી ચૂક્યો છે.
વડોદરા શહેરમાં પ્રોહિબિશન અને જુગારની અસામાજિક પ્રવૃત્તિઓ આચરતા તત્વો સામે કડક કાર્યવાહી કરવા માટે પોલીસ કમિશનર નરસિંહા કોમાર સાહેબ દ્વારા સ્પેશિયલ ડ્રાઈવ અંતર્ગત સૂચનાઓ આપવામાં આવી છે. જે અંતર્ગત પીસીબી (PCB) પોલીસ ઇન્સ્પેક્ટર જે.આર. ગામીતના માર્ગદર્શન હેઠળ પીસીબીની ટીમે હાઈવે પરથી કારમાં લવાતા વિદેશી દારૂના મોટા જથ્થા સાથે એક રીઢા બુટલેગરને ઝડપી પાડી ગણનાપાત્ર કેસ શોધી કાઢવામાં મોટી સફળતા મેળવી છે.
🧐બાતમીના આધારે હાઈવે પર ગોઠવી વોચ:
પીસીબીના એ.એસ.આઈ. જીજ્ઞેશભાઈ મથુરભાઈ તથા અ.હે.કો. દિલીપસિંહ ધર્મેન્દ્રસિંહના લોકલ નેટવર્કથી ચોક્કસ માહિતી મળી હતી કે, એક સફેદ કલરની અર્ટિગા ફોર વ્હીલર ગાડી (નંબર GJ-05-RJ-1228) માં વિદેશી દારૂનો મોટો જથ્થો ભરીને બે ઇસમો પોર તરફથી આવી રહ્યા છે અને વડોદરા શહેરમાં ઘુસાડવાના છે. આ બાતમીના આધારે પીસીબીની ટીમે નેશનલ હાઈવે 48 પર જામ્બુવા બ્રિજથી આગળ સાંકડા પુલ પાસે વ્યુહાત્મક વોચ ગોઠવી દીધી હતી. બાતમી મુજબની ગાડી આવતા જ પોલીસે તેને આંતરી લીધી હતી અને તપાસ કરતા અંદરથી વિદેશી દારૂની પેટીઓ મળી આવી હતી.
🚨પકડાયેલ આરોપીનું નામ:
- સન્ની ઉર્ફે બાબલો અજીતભાઈ રાજમલ (રહે. શક્તિ નગર સોસાયટી, ખોડીયારનગર-3, આજવા રોડ, વડોદરા).
👮શાતિર મોડસ ઓપરેન્ડી (M.O.):
પોલીસની પ્રાથમિક પૂછપરછમાં સામે આવ્યું છે કે બુટલેગરો ખૂબ જ આયોજનબદ્ધ રીતે આ નેટવર્ક ચલાવતા હતા. તેઓ વડોદરા શહેર બહારથી દારૂનો જથ્થો મેળવી ફોર વ્હીલર અને ટુ-વ્હીલરનો ઉપયોગ કરતા હતા. પોલીસ ચેકિંગથી બચવા માટે તેઓ હાઈવે પર અલગ-અલગ જગ્યાએ વારાફરતી ડ્રાઈવરો ચેન્જ કરી નાખતા હતા અને આગળ મોટરસાયકલ પર પોલીસ લોકેશનની બાતમી આપવા માટે પાઇલોટિંગ રાખતા હતા.
💰કબજે કરેલ કુલ મુદ્દામાલ (કિંમત ₹7,67,892):
1. ભારતીય બનાવટનો ઇંગ્લીશ દારૂ (બોટલ નંગ- 1,316) — કિંમત ₹2,62,892
2. એક મોબાઈલ ફોન — કિંમત ₹5,000
3.સફેદ મારૂતિ સુઝુકી અર્ટિગા કાર— કિંમત ₹5,00,000
🚨આરોપીનો ગુનાહિત ઇતિહાસ અને વોન્ટેડ લિસ્ટ:
પકડાયેલો આરોપી સન્ની ઉર્ફે બાબલો માથાભારે અને રીઢો ગુનેગાર છે. તે અગાઉ પણ બાપોદ પોલીસ સ્ટેશનના એક ગુનામાં પકડવાનો બાકી એટલે કે વોન્ટેડ હતો. આ સિવાય તેના નામે વારસીયા, કારેલીબાગ, ડી.સી.બી., છાણી અને આણંદના વાસદ પોલીસ સ્ટેશનમાં મારામારી, ધમકી, હથિયાર ધારો અને પ્રોહિબિશન એક્ટ હેઠળ કુલ 11 ગંભીર ગુનાઓ નોંધાયેલા છે. વડોદરા પોલીસ દ્વારા તેની ગુનાહિત પ્રવૃત્તિઓ પર લગામ લગાવવા માટે અગાઉ વર્ષ 2025માં બાપોદ પોલીસ સ્ટેશન હસ્તક ‘પાસા’ (PASA) હેઠળ જેલ ભેગો પણ કરવામાં આવ્યો હતો.
👉બે આરોપીઓ ફરાર:
પોલીસ દરોડા દરમિયાન આ કટીંગ અને હેરાફેરીના નેટવર્કમાં સામેલ અન્ય બે સ્થાનિક બુટલેગરો નાસી છૂટવામાં સફળ રહ્યા હતા, જેમને પોલીસે વોન્ટેડ જાહેર કર્યા છે:
1. નિરેન રાજપૂત (રહે. કિસનવાડી, વડોદરા)
2. અજય તડવી (રહે. કિસનવાડી, વડોદરા)
👮પીસીબી પોલીસે આ મામલે કપુરાઈ પોલીસ સ્ટેશન ખાતે પ્રોહિબિશન એક્ટ મુજબ ગુનો રજીસ્ટર કરાવી આગળની કાયદેસરની તપાસ હાથ ધરી છે.
