- નિષ્ફળ વહીવટ: પાલિકાએ વર્ષ 2025-26 માટે નક્કી કરેલો વેરા વસૂલાતનો ટાર્ગેટ સિદ્ધ ન થયો; આવક કરતા ખર્ચનું ભારણ વધ્યું.
- ₹48.30 કરોડનો મોટો ફટકો: અનેક રાહતો અને સ્કીમો આપવા છતાં પાલિકા લક્ષ્યાંકથી રહી ગઈ દૂર; તંત્રની કામગીરી પર સવાલો.
- આર્થિક કટોકટીના એંધાણ: જો સ્થિતિ ન સુધરે તો કર્મચારીઓના પગાર અને વિકાસકામો માટે પાલિકાએ પોતાની ‘FD’ તોડવી પડશે.
- સરકાર સામે લંબાવવો પડશે હાથ: આવક ઘટતા હવે રાજ્ય સરકારની ગ્રાન્ટ અથવા નાણા ભંડોળ પર નિર્ભર રહેવાની નોબત.
વડોદરા: સ્માર્ટ સિટી વડોદરાના વહીવટી તંત્રની આર્થિક ગાડી પાટા પરથી ઉતરી રહી હોય તેવા દ્રશ્યો સર્જાઈ રહ્યા છે. એક તરફ કોર્પોરેશનના ખર્ચમાં દિન-પ્રતિદિન તોતિંગ વધારો થઈ રહ્યો છે, ત્યારે બીજી તરફ પાલિકાના આવકના મુખ્ય સ્ત્રોત એવા ‘વેરા વસૂલાત’માં તંત્ર ફ્લોપ સાબિત થયું છે. નાણાકીય વર્ષ 2025-26 માટે મૂકેલો લક્ષ્યાંક સિદ્ધ કરવામાં પાલિકા નિષ્ફળ રહી છે.
🔂આંકડાકીય માયાજાળ અને નિષ્ફળતા:
વડોદરા મહાનગરપાલિકાએ વર્ષ 2025-26 માટે કુલ ₹790 કરોડ વેરા વસૂલાતનો લક્ષ્યાંક રાખ્યો હતો. આશ્ચર્યની વાત એ છે કે, આ લક્ષ્યાંક ગત વર્ષ જેટલો જ રાખવામાં આવ્યો હતો, છતાં તંત્ર તેને આંબી શક્યું નથી. વર્ષના અંતે પાલિકાની તિજોરીમાં માત્ર ₹741.70 કરોડ જ જમા થયા છે. એટલે કે, નિયત લક્ષ્યાંક કરતા ₹48.30 કરોડ ઓછી આવક થઈ છે.
🧐રાહતો આપી છતાં પરિણામ શૂન્ય:
ચાલુ નાણાકીય વર્ષ દરમિયાન પાલિકા દ્વારા બાકી વેરા વસૂલાત માટે વ્યાજ માફી અને વિવિધ રાહત યોજનાઓ (Rebate Schemes) જાહેર કરવામાં આવી હતી. તંત્રને આશા હતી કે આ સ્કીમોને કારણે લોકો બાકી વેરો ભરશે અને તિજોરી છલકાશે. પરંતુ, આંકડાઓ સાક્ષી પૂરે છે કે પાલિકાની વસૂલાત ટીમો બાકીદારો પાસેથી નાણાં કઢાવવામાં નબળી સાબિત થઈ છે.
📛ગંભીર આર્થિક સંકટ:
વધતા જતા વહીવટી ખર્ચ, વીજળી બિલ અને અન્ય વિકાસકામોના ભારણ વચ્ચે આવકમાં પડેલો આ મોટો ખાડો પાલિકાની આર્થિક સ્થિતિને વધુ કટોકટીભરી બનાવી શકે છે. નિષ્ણાતોનું માનવું છે કે જો આવી જ સ્થિતિ રહી, તો પાલિકાએ પોતાના અનામત ભંડોળ અથવા એફડી (FD) તોડવાની નોબત આવશે અથવા તો રાજ્ય સરકાર પાસે વિશેષ પેકેજની માંગણી કરવી પડશે.
❓શું વડોદરા પાલિકાના સત્તાધીશો આ આર્થિક ખાડાને પૂરવા માટે જનતા પર નવો વેરો ઝીંકશે કે પછી વસૂલાતની કામગીરી કડક બનાવશે?
