વડોદરામાં હરણી રોડ વિજય નગર વિસ્તારમાં મહિલાએ કરી આત્મહત્યા.
- વારસિયા રિંગ રોડ: માઈ મંદિર પાસે ઝાડ સાથે ફાંસો ખાઈ ટૂંકાવ્યું જીવન.
- હૈયાફાટ રુદન: બકરા માટે પાલો લેવા નીકળેલી મહિલાના મોતથી પરિવાર સ્તબ્ધ.
- પોલીસ કાર્યવાહી: વારસિયા પોલીસ અને ૧૧૨ જનરક્ષકની ટીમ ઘટના સ્થળે.
વડોદરા: સંસ્કારી નગરી વડોદરાના હરણી રોડ પર આવેલ વિજય નગર વિસ્તારમાં આજે એક હૃદયદ્રાવક ઘટના સામે આવી છે. વારસિયા રિંગ રોડ પર આવેલા વિજયનગર માઈ મંદિર પાસે એક પરિણીતાએ ઝાડ પર દોરડા વડે ગળે ફાંસો ખાઈ આપઘાત કરી લેતા ચકચાર મચી ગઈ છે.
મળતી માહિતી મુજબ, મૃતક મહિલાનું નામ ધનસાબેન હસમુખભાઈ ચુનારા હોવાનું જાણવા મળ્યું છે, જેઓ નિધિ ફ્લેટની પાછળ કાળકા માતાના મંદિર પાસે રહેતા હતા. આજે સવારના સમયે તેઓ પોતાના બકરા માટે પાલો (ચારો) કાપવા માટે નીકળ્યા હતા. જોકે, તે દરમિયાન મંદિરની બાજુમાં આવેલા વડના ઝાડ સાથે દોરડું બાંધી તેમણે અગમ્ય કારણોસર ફાંસો ખાઈ લીધો હતો.
🧐વિસ્તારમાં શોકનું મોજું:
ભરચક અને અવરજવર વાળા વિસ્તારમાં આ પ્રકારે આત્મહત્યાની ઘટના બનતા સ્થાનિક લોકોના ટોળેટોળા એકઠા થયા હતા. 112 જનરક્ષકની ટીમ તાત્કાલિક ઘટના સ્થળે દોડી આવી હતી. બીજી તરફ, બનાવની જાણ થતા જ વારસિયા પોલીસનો કાફલો પણ ઘટના સ્થળે પહોંચી કાયદેસરની કાર્યવાહી હાથ ધરી છે.
👉પરિવાર પર આભ ફાટ્યું:
પોતાની માતા અને પત્નીને ગુમાવતા જ પતિ અને દીકરીઓના હૈયાફાટ રુદનથી વાતાવરણ ગમગીન બની ગયું હતું. મહિલાએ કયા કારણોસર આ અંતિમ પગલું ભર્યું તે અંગે હજુ સુધી કોઈ સ્પષ્ટતા થઈ નથી. પોલીસે મૃતદેહને પોસ્ટમોર્ટમ અર્થે ખસેડી વધુ તપાસ શરૂ કરી છે.
🫵આત્મહત્યા એ કોઈ સમસ્યાનો ઉકેલ નથી. જો તમે અથવા તમારી ઓળખીતું કોઈ માનસિક તણાવ અનુભવી રહ્યું હોય, તો કૃપા કરીને હેલ્પલાઈન નંબર પર સંપર્ક કરો.
