વડોદરામાં પ્રોહિબિશનની અમલવારી વચ્ચે PCB ની ટીમે નવા એક્સપ્રેસ હાઈવે પર મોટી કાર્યવાહી કરીને દારૂના સોદાગરોની ઊંઘ ઉડાવી દીધી છે. બાતમીના આધારે કરવામાં આવેલી આ કાર્યવાહીમાં પોલીસે લાખો રૂપિયાનો મુદ્દામાલ કબજે કર્યો છે.
👉ઘટનાની વિગત
પીસીબી ટીમને મળેલી ચોક્કસ બાતમી મુજબ, ભરૂચથી અમદાવાદ તરફ જઈ રહેલા એક સફેદ રંગના અશોક લેલેન્ડ ટ્રકમાં દારૂનો જથ્થો હોવાની માહિતી મળી હતી. આ બાતમીને આધારે નંદેસરી ચોકડી પાસે ફાજલપુર ઉતરવાના નાકા પાસે વોચ ગોઠવવામાં આવી હતી.
શરૂઆતમાં તપાસ દરમિયાન ટ્રકમાં કંઈ શંકાસ્પદ જણાયું નહોતું, પરંતુ પોલીસે જીવત તપાસ કરતા ડ્રાઇવરની કેબિનની પાછળ ખાસ રીતે બનાવેલા ‘ચોરખાના’ મળી આવ્યા હતા. આ ગુપ્ત ખાનાઓમાંથી વિદેશી દારૂની બોટલો અને બિયરના ટીનનો મોટો જથ્થો મળી આવ્યો હતો.
📍મુદ્દામાલ અને ધરપકડ
પોલીસે આ કેસમાં રાજસ્થાનના બાડમેરના રહેવાસી બે શખ્સોની ધરપકડ કરી છે:
- જોધારામ જોગારામ જાટ (ડ્રાઈવર)
- ભાગીરથ સમારામ જાટ (ક્લીનર)
✍️કુલ જપ્ત કરેલ મુદ્દામાલ:
- વિદેશી દારૂ-બિયર: ₹34.87 લાખ
- ટ્રકની કિંમત: અંદાજે ₹15 લાખ
- રોકડ અને મોબાઈલ: ₹23,000 થી વધુ
- કુલ આંકડો: ₹50.10 લાખ
🚨નંદેસરી પોલીસ સવાલોના ઘેરામાં
આ સમગ્ર ઓપરેશનમાં સૌથી ચોંકાવનારી બાબત નંદેસરી પોલીસની નિષ્ક્રિયતા રહી છે. એક્સપ્રેસ હાઈવે પરથી આટલી મોટી માત્રામાં દારૂ પસાર થઈ રહ્યો હતો અને પેટ્રોલિંગ કરતી નંદેસરી પોલીસને તેની ગંધ પણ ન આવી. પીસીબીની આ કાર્યવાહીએ સ્થાનિક પોલીસની કાર્યશૈલી પર ગંભીર સવાલો ઉભા કર્યા છે.
🧐વોન્ટેડ આરોપીઓ
તપાસમાં સામે આવ્યું છે કે આ જથ્થો સુત્રારામ સારણ જાટ અને સુરજખાન નામના શખ્સોએ મંગાવ્યો હતો. હાલ પોલીસે કુલ ચાર શખ્સોને વોન્ટેડ જાહેર કરી વધુ તપાસ હાથ ધરી છે.
