વડોદરામાં ‘ડેથ ટ્રેપ’: ચોમાસામાં તૂટેલા ગટરના ઢાંકણાં અકસ્માતને આમંત્રણ, VMC કામગીરી પર ઉઠ્યા સવાલો

• અકસ્માતનું જોખમ: ચોમાસામાં પાણી ભરાવાથી ખુલ્લી ગટરો જીવલેણ સાબિત થઈ શકે છે.
• ભ્રષ્ટાચારનો આક્ષેપ: ગટરના ઢાંકણાંની ગુણવત્તા અને કામગીરીમાં કૌભાંડ હોવાના આક્ષેપો.
• તંત્રની બેદરકારી: કપૂરાઈ સહિત અનેક વિસ્તારોમાં લાંબા સમયથી તૂટેલા ઢાંકણાં, સ્થાનિકો દ્વારા આડાશ મૂકવાની ફરજ પડી.
• કાયમી ઉકેલની માગ: જવાબદાર અધિકારીઓ અને કોન્ટ્રાક્ટરો સામે તપાસ કરી કડક કાર્યવાહીની માંગ.

વડોદરા: ચોમાસાના આગમન સાથે જ વડોદરા શહેરમાં જૂની અને જાણીતી સમસ્યા ગટરના તૂટેલા ઢાંકણાં ફરી એકવાર માથું ઊંચકી રહી છે. કપૂરાઈ મુખ્ય માર્ગ સહિત શહેરના અનેક વિસ્તારોમાં ગટરના ઢાંકણાં તૂટેલી હાલતમાં હોવાથી વાહનચાલકો અને રાહદારીઓ માટે અકસ્માતનું મોટું જોખમ ઊભું થયું છે.

🧐ભ્રષ્ટાચારના આક્ષેપ:

આ મામલે સામાજિક કાર્યકર પંકજ દર્વેએ પાલિકાતંત્રની કામગીરી અને વપરાતી સામગ્રીની ગુણવત્તા સામે ગંભીર આક્ષેપો કર્યા છે. તેમણે જણાવ્યું કે, એક જ સ્થળે વારંવાર ઢાંકણાં તૂટી જવા પાછળ કોન્ટ્રાક્ટરો અને જવાબદાર અધિકારીઓની મિલીભગત તેમજ મોટા કૌભાંડની ગંધ આવે છે. નવા ઢાંકણાં લગાવવા છતાં તે ટકી શકતા નથી, જે કામગીરીની નબળી ગુણવત્તા દર્શાવે છે. તેમણે કોન્ટ્રાક્ટરો અને અધિકારીઓની ફાઈલોની તપાસ કરી કડક પગલાં લેવાની માંગ કરી છે.

🗣️જીવલેણ સ્થિતિ:

ચોમાસામાં વરસાદી પાણી રસ્તા પર ભરાઈ જવાથી આ ખુલ્લી ગટરો દેખાતી નથી, જે ગંભીર દુર્ઘટનાઓને આમંત્રણ આપે છે. નોંધનીય છે કે અગાઉ વડોદરામાં ગટરમાં પડી જવાથી એક નાગરિકે પોતાનો જીવ ગુમાવ્યો હતો, તેમ છતાં તંત્ર દ્વારા કોઈ નક્કર પગલાં લેવામાં આવતા નથી. હાલમાં કપૂરાઈ ખાતે સ્થાનિકોએ અકસ્માત ટાળવા માટે પોતાની રીતે આડાશ મૂકીને તંત્રની લાપરવાહીને જાહેરમાં લાવી દીધી છે.

⚠️તંત્રની કામગીરી સામે રોષ:

શહેરમાં ઠેર-ઠેર જોવા મળતી આ સમસ્યાને લઈને નાગરિકોમાં રોષ ભભૂકી ઉઠ્યો છે. વરસાદની સિઝન પૂર્વે કામગીરી કરવાની વાતો કરતું પાલિકાતંત્ર વાસ્તવમાં કેટલું સજ્જ છે, તે આ તૂટેલા ઢાંકણાં સાબિત કરી રહ્યા છે. લોકો હવે માંગ કરી રહ્યા છે કે વહેલી તકે આ તમામ જોખમી ઢાંકણાં બદલીને સુરક્ષા સુનિશ્ચિત કરવામાં આવે.