- ફતેહગંજમાંથી ધરપકડ: શ્રીનગર સોસાયટીના નાકેથી ક્રાઈમ બ્રાન્ચે બાતમીના આધારે કુખ્યાત આરોપીને દબોચી લીધો.
- ગુજસીટોક બાદ ફરી ગુનો: ગુજસીટોકના ગુનામાં જામીન મુક્ત થયા બાદ આરોપીએ કુંભારવાડા વિસ્તારમાં મારામારીનો ગુનો આચર્યો હતો.
- રીક્ષા ચાલકને ધમકી: “અમારા વિરુદ્ધ ફરિયાદ કરી તો સુરસાગરમાં નાખી દઈશ” કહી રીક્ષા ચાલકને જાનથી મારી નાખવાની ધમકી આપી હતી.
- 9 ગુનાનો ઈતિહાસ: આરોપી અગાઉ લૂંટ, ચોરી, પ્રોહિબિશન અને જુગાર જેવા 9 ગંભીર ગુનાઓમાં પકડાઈ ચૂક્યો છે અને ‘પાસા’ પણ કાપી આવ્યો છે.
વડોદરા શહેરમાં જુદા-જુદા ગુનાઓમાં સંડોવાયેલા અને ધરપકડ ટાળવા માટે લાંબા સમયથી ફરાર થઈ નાસતા ફરતા આરોપીઓને શોધી કાઢવા માટે પોલીસ કમિશનર અને સંયુક્ત પોલીસ કમિશનર દ્વારા ક્રાઈમ બ્રાન્ચને ખાસ સૂચના આપવામાં આવી હતી. જે અંતર્ગત ક્રાઈમ બ્રાન્ચની ટીમો સતત પેટ્રોલીંગ અને વોચમાં હતી. આ દરમિયાન ક્રાઈમ બ્રાન્ચને વડોદરાની કુખ્યાત ‘કાસમઆલા ગેંગ’ના એક સક્રિય અને રીઢા ગુનેગારને ઝડપી પાડવામાં મોટી સફળતા મળી છે.
🧐બાતમીના આધારે ફતેહગંજમાંથી દબોચ્યો:
ક્રાઈમ બ્રાન્ચની ટીમ જ્યારે શહેર વિસ્તારમાં પેટ્રોલીંગમાં હતી, ત્યારે મળેલી ચોક્કસ બાતમીના આધારે પોલીસે ફતેહગંજ શ્રીનગર સોસાયટીના નાકે વોચ ગોઠવી હતી. પોલીસે ત્યાંથી પસાર થતા એક શંકાસ્પદ ઇસમને ઝડપી પાડી પૂછપરછ અને ખાતરી કરતા તે કુંભારવાડા પોલીસ સ્ટેશનના શારીરિક ઈજા અને ધમકીના ગુનામાં નાસતો ફરતો આરોપી હોવાનું સામે આવ્યું હતું.
👉ઝડપાયેલા આરોપીનું નામ:
- મોહમ્મદહલીમ ઉર્ફે હલીમા સલીમખાન પઠાણ (મન્સુરી) (રહે. મન્સુરી કબ્રસ્તાન, મોતીનગર, વડોદરા).
🚨કુંભારવાડા પોલીસ સ્ટેશનનો ગુનો અને ધમકીની મોડસ ઓપરેન્ડી:
આ પકડાયેલા આરોપી અને તેના સાગરીત સામે કુંભારવાડા પોલીસ સ્ટેશનમાં BNS કલમ 11 canvas(2), 296(બી), 351(2), 54 મુજબ ગુનો નોંધાયેલો છે. ઘટનાની ટૂંકી વિગત એવી છે કે, ગત તા.02/04/2026 ના રોજ સવારે એક ઓટોરીક્ષા ચાલક હાથીખાના પાણીના પરબ રીક્ષા સ્ટેન્ડ પાસે ઉભા હતા. તે વખતે આરોપી મોહમ્મદહલીમ ઉર્ફે હલીમા પઠાણ અને તેનો સાગરીત હુસેન કાદરમીયા સુન્ની સ્વિફ્ટ ગાડી લઈને ત્યાં આવ્યા હતા.
આરોપીઓએ રીક્ષા ચાલકને ધમકાવતા કહ્યું હતું કે, “તું મારા ભાઈ અકબર સુન્નીના છોકરાઓને અને તેની પત્નીને રીક્ષામાં સ્કૂલે મૂકવા જતો નહીં”. તેમ કહીને રીક્ષા ચાલકના ગાલ પર થપ્પડ મારી દીધી હતી. આ સાથે જ આરોપી મોહમ્મદહલીમે ધમકી આપતા કહ્યું હતું કે, “જો અમારા વિરુદ્ધ પોલીસમાં ફરિયાદ કરી છે, તો તને સુરસાગર તળાવમાં નાખી દઈશ”. આરોપીઓએ જાહેરમાં ગંદી ગાળો આપી જાનથી મારી નાખવાની ધમકી આપી ગુનો આચર્યો હતો, ત્યારથી આરોપી મોહમ્મદહલીમ ધરપકડ ટાળવા ફરાર હતો.
👮ગુજસીટોકનો આરોપી અને ગુનાહિત ઇતિહાસ:
પોલીસ તપાસમાં સામે આવ્યું છે કે ઝડપાયેલો આરોપી મોહમ્મદહલીમ વડોદરાની ખતરનાક ‘કાસમઆલા ગેંગ’નો સભ્ય છે. અગાઉ તેની સામે સંગઠિત ગુનાખોરી અટકાવવાના કાયદા ‘ગુજસીટોક’ (GUJCTOC) હેઠળ ગુનો નોંધી જેલભેગો કરાયો હતો. આ ગુજસીટોકના ગુનામાં હાઈકોર્ટમાંથી જામીન મુક્ત થયા બાદ તરત જ તેણે ફરીથી કુંભારવાડામાં આ મારામારી અને ધમકીનો ગુનો આચર્યો હતો. આરોપી સામે ભૂતકાળમાં લૂંટ, ચોરી, પ્રોહિબિશન અને જુગારના કુલ 09 (નવ) જેટલા ગંભીર ગુનાઓ નોંધાઈ ચૂક્યા છે અને તે અગાઉ ‘પાસા’ (PASA) હેઠળ જેલની હવા પણ ખાઈ આવ્યો છે.
ક્રાઈમ બ્રાન્ચે આરોપીની અટકાયત કરી, ગુનાની આગળની કાયદેસરની તપાસ અને કાર્યવાહી માટે તેને કુંભારવાડા પોલીસ સ્ટેશનને સોંપવાની તજવીજ હાથ ધરી છે.
