વડોદરા: શહેરના મકરપુરા પોલીસ સ્ટેશન વિસ્તારમાં રાત્રિના સમયે સાઇકલ ચલાવવા બાબતે થયેલી બોલાચાલીએ હિંસક સ્વરૂપ ધારણ કર્યું હતું. તરસાલી વિસ્તારમાં આવેલા દિવાળીપુરા સ્લમ ક્વાર્ટર્સમાં સામસામે થયેલી પથ્થરમારો અને મારામારીની ઘટનામાં પોલીસે તાત્કાલિક કાર્યવાહી કરી બંને પક્ષના કુલ 6 આરોપીઓની ધરપકડ કરી છે.
❓શું હતી સમગ્ર ઘટના?
ગઈકાલ તા. 10 ફેબ્રુઆરીના રોજ રાત્રે આશરે 11:30 વાગ્યાના સુમારે તરસાલી શાકમાર્કેટ સામે આવેલા દિવાળીપુરા સ્લમ ક્વાર્ટર્સમાં એક કિશોર ઝડપથી સાઇકલ લઈને પસાર થઈ રહ્યો હતો. આ બાબતે પાડોશીએ ઠપકો આપતા મામલો ગરમાયો હતો. સામાન્ય બોલાચાલી જોતજોતામાં ઉગ્ર ઝઘડામાં ફેરવાઈ ગઈ હતી અને બંને પક્ષના લોકો સામસામે આવી જઈ મારામારી પર ઉતરી આવ્યા હતા.
🚨પોલીસની તાત્કાલિક કાર્યવાહી
ઘટનાની જાણ થતા જ વડોદરા શહેર પોલીસ કમિશનર નરસિમ્હા કોમાર, એડિશનલ પોલીસ કમિશનર ડો. લીના પાટીલ અને DCP ઝોન-3 અભિષેક ગુપ્તાના માર્ગદર્શન હેઠળ મકરપુરા પી.આઈ. એ.એમ. ગોહેલ અને તેમની ટીમે તપાસનો ધમધમાટ શરૂ કર્યો હતો. હ્યુમન ઇન્ટેલિજન્સ અને ટેકનિકલ સોર્સની મદદથી પોલીસે ગણતરીના કલાકોમાં જ તમામ સંડોવાયેલા શખ્સોને પકડી પાડ્યા હતા.
🧐ધરપકડ કરાયેલા આરોપીઓની વિગત
પક્ષ-1 (ફરિયાદી: ધવલકુમાર પરમાર)
- અનવર ઉર્ફે અબુબકર હુસેન દિવાન
- જુનેદ કાઠીયાવાડી સુલેમાન પઠાન
પક્ષ-2 (ફરિયાદી: જુનેદહુસેન દિવાન)
- ધવલભાઈ રવિભાઈ પરમાર
- ધ્રુવ ઉર્ફે ભયુ રવિભાઈ પરમાર
- ભુપેન્દ્રભાઈ ઉર્ફે પપ્પુ રતનસિંહ રાજપૂત
- ગૌરાંગભાઈ શાંતિલાલ પરમાર
👉વર્તમાન સ્થિતિ
મકરપુરા પોલીસે બંને પક્ષે ગુનો નોંધી ભારતીય ન્યાય સંહિતા (BNS) ની વિવિધ કલમો હેઠળ કાયદેસરની કાર્યવાહી હાથ ધરી છે. હાલ ઘટનાસ્થળે પોલીસ બંદોબસ્ત ગોઠવી દેવામાં આવ્યો છે અને સમગ્ર વિસ્તારમાં શાંતિપૂર્ણ માહોલ છે.
