- પકડાયેલા આરોપી: સાજીદખાન સલીમખાન પઠાણ અને આયુષ દેવીપ્રસાદ મિશ્રા (બંને રહે. સુરત, મૂળ ઉત્તરપ્રદેશ).
- જપ્ત મુદ્દામાલ: રોકડ રૂ. 80,000 મારૂતિ બલેનો કાર (કિં. 6 લાખ) અને મોબાઈલ મળી કુલ રૂ. 6,80,500 મુદ્દામાલ જપ્ત.
- ગેંગની રચના: કુલ 4 સભ્યોની ગેંગ સુરતથી વડોદરા ઓપરેટ કરતી હતી.
- ડિટેક્ટ થયેલા ગુના: માંજલપુર પોલીસ સ્ટેશનમાં નોંધાયેલ ૨ લાખની ચોરીનો ગુનો ઉકેલાયો.
વડોદરાના મકરપુરા GIDC વિસ્તારમાં ગત 13 માર્ચના રોજ યુનિયન બેંકમાં નાસ્તો કરવાના બહાને બોલાવી એક વ્યક્તિ પાસેથી 2 લાખ રૂપિયાની નજરચૂકવી ચોરી થઈ હતી. આ ગંભીર ગુનામાં વડોદરા ક્રાઈમ બ્રાન્ચે ટેકનિકલ સર્વેલન્સ અને સીસીટીવી ફૂટેજના આધારે તપાસ તેજ કરી હતી. જેમાં રાજસ્થાન પાસિંગની એક શંકાસ્પદ બલેનો કાર પોલીસના રડારમાં આવી હતી.
ક્રાઈમ બ્રાન્ચની ટીમે પેટ્રોલિંગ દરમિયાન દંતેશ્વર તળાવ પાસે આ બલેનો કારને આંતરી હતી. કારમાં સવાર સાજીદખાન ઉર્ફે બાબુ પઠાણ અને આયુષ મિશ્રાની અટકાયત કરી પૂછપરછ કરતા ચોંકાવનારી વિગતો બહાર આવી છે. આ ગેંગ સુરતથી વડોદરા ચોરી કરવા માટે જ આવતી હતી.
આરોપીઓની મોડસ ઓપરેન્ડી ખૂબ જ અનોખી છે. તેઓ રૂમાલમાં કાગળના ટુકડાઓનું બંડલ બનાવતા અને તેના પર 500ની અસલ નોટ લગાવી દેતા. બેંકમાં નાણાં જમા કરાવવા આવતા ભોગ બનનારને તેઓ ‘બે નંબરના રૂપિયા’ હોવાનું કહી વિશ્વાસમાં લેતા અને નજર ચૂકવી અસલ રોકડ રકમની થેલી સાથે કાગળનું બંડલ બદલી નાખતા હતા.
🚨આરોપીઓનો ગુનાહિત ઈતિહાસ
- આયુષ મિશ્રા: સુરત, વરાછા, સચીન, સોનગઢમાં ચોરી અને ઠગાઈના કુલ 7 ગુના.
- સાજીદખાન ઉર્ફે બાબુ: સુરત ગ્રામ્યમાં અગાઉ નોંધાયેલ ગુનો.
- અન્ય ગુના: મહારાષ્ટ્રના શિરીડી, ચાકણ અને નાસિકમાં પણ આ રીતે અનેક લોકો સાથે ઠગાઈ કરી હોવાની કબૂલાત.
👮વડોદરા પોલીસે આ આરોપીઓને પકડીને આંતરરાજ્ય ઠગ ગેંગનો પર્દાફાશ કર્યો છે. હાલમાં આ ટોળકીના અન્ય બે સાગરીતોને પકડવા માટે ચક્રો ગતિમાન કર્યા છે. બેંકમાં જતા નાગરિકો માટે આ કિસ્સો એક ચેતવણી સમાન છે કે અજાણ્યા લોકોની વાતમાં આવીને પોતાની રોકડ રકમ જોખમમાં ન મૂકવી.
