- વડોદરા: ગોરવા-લક્ષ્મીપુરા રોડ પર હિટ એન્ડ રન જેવી ઘટના!
- વોકિંગ કરી રહેલા બે વૃદ્ધ મિત્રોને કારે ઉડાવ્યા.
- બંને ઈજાગ્રસ્ત હાલતમાં ગોત્રી હોસ્પિટલમાં દાખલ. કાર ચાલકે જ 108 બોલાવી ઈજાગ્રસ્તોને હોસ્પિટલ મોકલ્યા.
વડોદરાના ગોરવા વિસ્તારમાં ફરી એકવાર તેજ રફ્તાર કારનો આતંક જોવા મળ્યો છે. ગોરવા-લક્ષ્મીપુરા રોડ પર સાંજના સમયે વોક માટે નીકળેલા બે સિનિયર સિટીઝન મિત્રોને એક પૂરઝડપે આવતી કારે પાછળથી જોરદાર ટક્કર મારી હતી. આ અકસ્માતમાં બંને વૃદ્ધોને ગંભીર ઈજાઓ પહોંચતા હાલ હોસ્પિટલમાં સારવાર હેઠળ છે.
મળતી માહિતી મુજબ, નીલકંઠ ટેનામેન્ટમાં રહેતા સુદામણભાઈ વિશાવે અને તેમના મિત્ર વસંતભાઈ તાનાજી અન્ય એક મિત્ર સાથે સાંજના સમયે ચાલવા નીકળ્યા હતા. બરોડા સ્કાય ચાર રસ્તા પાસે બાંકડા પર બેસીને જ્યારે તેઓ પરત ફરી રહ્યા હતા, ત્યારે લક્ષ્મીપુરાથી ગોરવા ITI તરફ જતી એક અજાણી કારે તેમને પાછળથી અડફેટમાં લીધા હતા.
👉 પીડિત પરિવારનું નિવેદન
આ ઘટનાની જાણ થતા જ સુદામણભાઈના પુત્ર રાજેશભાઈ ગોત્રી હોસ્પિટલ પહોંચ્યા હતા. અકસ્માત એટલો ભયાનક હતો કે સુદામણભાઈ હાલ બોલી શકે તેવી સ્થિતિમાં નથી. તેમના મિત્ર વસંતભાઈએ સમગ્ર ઘટનાની જાણકારી આપતા જણાવ્યું કે, કાર ચાલકે પાછળથી જોરદાર ટક્કર મારી હતી, જોકે અકસ્માત બાદ કાર ચાલકે જ 108 એમ્બ્યુલન્સ બોલાવી માનવતા દાખવી હતી અને ઈજાગ્રસ્તોને હોસ્પિટલ ખસેડ્યા હતા.
હાલમાં આ મામલે ગોરવા પોલીસને જાણ કરવામાં આવી છે અને પોલીસે અકસ્માતનો ગુનો નોંધી આગળની તપાસ હાથ ધરી છે. શહેરમાં વધતા જતા માર્ગ અકસ્માતો હવે વૉકિંગ માટે નીકળતા સિનિયર સિટીઝનો માટે પણ જોખમી સાબિત થઈ રહ્યા છે.
